Umujyanama wa Perezida wa Uganda Yoweri Kaguta Museveni,akaba n’umuhungu we, Lt Gen Muhoozi Kainerugaba mu gitondo cyo kuri uyu wa Kabiri tariki ya 15 Werurwe 2022, yasuye Urwibutso rwa Jenoside yakorewe Abatutsi rwa Kigali ruri ku Gisozi yunamira inzirakarengane zihashyinguye.
Lt Gen Muhoozi Kainerugaba yasuye Urwibutso rwa Jenoside rwa Kigali, yunamira ndetse ashyira indabo ku mva z’abishwe muri Jenoside yakorewe Abatutsi.
Ku wa mbere nibwo Lt Gen Muhoozi yageze mu gihugu, aza no kugirana ibiganiro na Perezida Kagame bigamije kurushaho kunoza umubano w’ibihugu byombi.
Ubwo yageraga ku rwibutso rwa Kigali ruri ku Gisozi, Lt Gen Muhoozi Kainerugaba, yashyize indabo ku mva ziruhukiyemo Abatutsi maze yunamira izo nzirakarengane.
Mu gitabo cyandikwamo n’abasuye urwibutso yagize ati “ Mbabajwe nibyo mbonye kuri uru rwubutso rwa Jenoside yakorewe abaturage b’iki gihugu mu mwaka wa1994.Ndashima ubuyobozi bw’iki gihugu buyobowe na Nyakubahwa Paul Kagame bwatekereje kubaka uru rwibutso kugira ngo abazavuka ejo hazaza batazasubira mu makosa yakozwe n’ababanjirije.”
Urwibutso rwa Jenoside rwa Kigali Gen Muhoozi yasuye, rushyinguyemo imibiri isaga ibihumbi 250 y’abazize Jenoside yakorewe Abatutsi mu 1994 biciwe mu duce dutandukanye two mu Mujyi wa Kigali.
Lt Gen Muhoozi Kainerugaba yashenguwe n’ibyo yabonye mu Rwibutso rwa Jenoside rwa Kigali
Ukeneye kwamamaza! Gusobanuza! Gutanga amakuru? Hamagara 0788772818
TUYISHIMIRE RAYMOND / UMUSEKE.RW
Karamaga Jeanine
March 16, 2022 at 9:17 am
Twizere ko Muhoozi yibutse kandi akemera uruhare rwa Uganda mu mahano yagwiriye igihugu cyacu. Iyo Uganda idatera Urwanda, yenda ibyabaye ntibyari kuba. Kwemera ni kimwe ariko se impozamalira izaza lyali?