Abasirikare 15 ba Siriya baguye mu gitero cyagabwe n’umutwe wa ISIS

Abasirikare 15 ba Leta ya Siriya baguye mu gitero cyagabwe n’umutwe w’iterabwoba wa ISIS wakoze kuri bisi ya Gisirikare mu butayu bwo muri Siriya.

Imibare yabaguye muri iki gitero ishobora kwiyongera nk’uko bivugwa n’ishyirahamwe riharanira uburenganzira bwa muntu muri Siriya

Ibi byabaye kuri iki Cyumweru tariki ya 06 Werurwe 2022 nk’uko byatangajwe n’Ibiro Ntaramakuru bya Leta, SANA.

SANA yatangaje ko abasirikare 15 bapfuye mu gihe abagera kuri 19 bakomeretse.

Umutwe w’iterabwoba wa ISIS ushinjwa kugaba iki gitero nta makuru uratangaza.

N’ubwo uyu mutwe watsinzwe mu mwaka wa 2019, uracyagaba ibitero hirya no hino kuva ku murwa mukuru Damas kugera ku mbibi za Siriya na Iraq.

Mu ntangiro za Mutarama, abasirikare 9 ba Siriya biciwe mu gitero cyagabwe ku modoka za Gisirikare mu burasirazuba bwa Siriya.

Kuva intambara yatangira muri Siriya mu mwaka wa 2011, hafi abantu barenga magana atanu barishwe mu gihe ama miliyoni yahunze intambara.

NDEKEZI JOHNSON / UMUSEKE.RW