Kabuhariwe mu mikino njyarugamba, Conor McGregor yatangaje ko yifuza kugura ikipe y’umupira w’amaguru ya Chelsea nyuma y’uko umuherwe nyirayo Roman Abramovich atangaje ko ashaka kuyigurisha akabona amafaranga yo gufasha abari kugirwaho ingaruka n’intambara iri kuba muri Ukraine.
Conor McGregor ni umwe mu bakinnyi bafite agatubutse
Kuri uyu wa Gatatu tariki 02 Weruwe 2022, umuherwe w’Umurusiya Roman Abramovich nyiri Chelsea, yatangaje ko yifuza kugurisha iyi kipe ikomeye ku Mugabane w’u Burayi kugira ngo abone amafaranga yo gufasha abari kugirwaho ingaruka n’Intambara iri kubera muri Ukraine yashojwe n’Igihugu akomokamo.
Nyuma y’uko uyu munyemari atangaje ibi, undi muherwe Conor McGregor wubatse izina mu mikino njyarugamba, yahise atangaza ko ashaka kugura iyi kipe.
Mu butumwa yanyujije kuri Twitter, Conor McGregor yahise atangaza ko “Chelsea iri kugurwa Miliyari 3 £. Mureke tuyigure.”
I wish to explore this. @ChelseaFC pic.twitter.com/ABEjjCqhD7
— Conor McGregor (@TheNotoriousMMA) March 2, 2022
Ni ubutumwa bugaragara ko ari ikiganiro yagiranye n’abandi kuri WhatsApp, aho uyu kabuhariwe mu mukino w’iteramakofi, we ubwe yivugiye ko ashaka kuyigura.
Ubu butumwa bwafashwe sreenshot, yabushyize kuri Twitter ye, avuga ko yifuza kugura iyi kipe ikomeye.
Uyu mukinnyi w’Umunya-Ireland Conor McGregor ni umwe mu bakinnyi batunze amafaranga menshi ku Isi kuko mu myaka ibiri itambutse yose yaba uwa 2020 n’uwa 2021 ari we winjije amafaranga menshi muri iyo myaka, ahigitse ba rutahizamu Cristiano Ronaldo ndetse na Lionel Messi.
Urutonde rwatangajwe na Forbes muri 2021, rwagaragazaga ko Conor McGregor yinjije miliyoni 180 Euro yiganjemo ayo yakuye mu nzoga ya Whiskey yamwinjirije Miliyoni 150 Euro.
UMUSEKE.RW
