Umusirikare mukuru mu ngabo za FARDC yaguye mu mirwano yabereye muri Teritwari ya Rutshuru yabaye hagati y’ingabo za leta n’inyeshyamba z’abahoze ari abarwanyi ba M23.
Colonel wa FARDC yaguye mu mirwano yabahuje n’abarwanyi ba M23
Iyi mirwano yabaye kuva ku wa Mbere tariki ya 24 Mutarama 2022, yatangiye isaa yine z’ijoro ahitwa Nyesisi, ni mu birometero bicye uvuye ku kigo cya Gisirikare cya Rumangabo muri Gurupema ya Kisigari.
Abasirikare 10 ba Leta ya Congo barimo Colonel baguye muri iyi mirwano nk’uko byemejwe n’igisirikare cya Leta.
Col Dume wayoboraga ingabo za FARDC muri kariya gace yaguye muri biriya bitero byumvikanyemo imbunda zikaze ku mpande zombi.
Abaturage bo mu bice byabereyemo guhangana kw’ingabo za FARDC na M23 batangiye guhunga nk’uko ACTUALITE.CD yabitangaje.
Kuva mu mwaka ushize wa 2021, abarwanyi ba M23 bakomeje kuvugwaho kugaba ibitero muri Teritwari ya Rutshuru muri Kivu ya Ruguru.
Colonel Muhindo Lwanzo Rams, Umuyobozi muri teritwari ya Rutshuru yemeje ko ibirindiro bya FARDC i Nyesisi byatewe na M23, bihitana abasirikare 10 ba Leta abandi barakomereka.
Umutwe wa M23 ntago uratangaza kuri ibi bitero bishya ushinjwa kugaba ku ngabo za Leta ya Repubulika ya Demokarasi ya Congo.
NDEKEZI JOHNSON / UMUSEKE.RW
musema
January 26, 2022 at 3:55 pm
Intambara zo muli Africa usanga akenshi ari abenegihugu barwana hagati yabo (civil wars).Ahanini bishingiye ku karere,amoko (tribes) cyangwa idini.Bitandukanye nuko imana yaturemye idusaba gukundana,ikatubuza kurwana,ndetse idusaba “gukunda n’abanzi bacu” nkuko Matayo 5:44 havuga.Ikongeraho ko “yanga umuntu wese umena amaraso y’undi” nkuko Zaburi 5:6 havuga.Niyo mpamvu Abakristu nyakuli batajya mu ntambara zibera muli iyi si.Bazirikana ko ku munsi w’imperuka imana izakura mu isi abarwana bose.Soma Matayo 26:52.Kimwe n’abandi bose bakora ibyo Imana itubuza.