Minisitiri w’Ububanyi n’Amahanga w’u Rwanda Dr Vincent Biruta yasuye ingabo z’u Rwanda ziri mu butumwa bw’amahoro bw’Umuryango w’Abibubumbye muri Centrafrica azishyikiriza ubutumwa bwa Perezida Kagame.
Ministiri Biruta yasuye ingabo z’u Rwanda ziri muri Cnetrafrica
Ni mu ruzinduko yagiriye muri iki gihugu kuva kuwa 13 Mutarama 2022 kugeza ku wa 14 Mutarama, aho yasuye batayo ya 57 Task Force ku birindiro bikuru byayo biri Nzilla muri Bangui ndetse na Batayo ya 8 n’iya 9 zikambitse Sacatel Mpoka.
Aherekejwe na Brig Gen Nyakarundi Vincent ushinzwe ubutasi mu ngabo z’u Rwanda, Minisitiri Biruta ku wa 13 Mutarama nibwo yasuye batayo ya 57 Task Force iri Nzilla, naho ku wa 14 Mutarama 2022 akaba aribwo basuye ingabo z’u Rwanda zigize batayo ya 8 n’iya 9 ziri Mpoko.
Minisitiri w’Ububanyi n’Amahanga w’u Rwanda, Dr Vincent Biruta yashikirije izi ingabo ubutumwa bw’umugaba mukuru w’ikirenga Perezida wa Repubulika y’u Rwanda Paul Kagame bubifuriza umwaka mushya muhire ndetse bunabashimira akazi gakomeye kuzuye ikinyabupfura n’ubunyamwuga bakomeje kugaragaza muri Centrafrica.
Izi ngabo z’u Rwanda kandi zamenyeshejwe uko igihugu gihagaze mu rwego rw’umutekano ndetse banabwirwa icyo igihugu kiri gukora mu rwego rwo guhangana n’icyorezo cya Covid-19, ibi bijyana no guhabwa ishusho ku mubano w’u Rwanda n’ibihugu bituranye.
Brig Gen Nyakarundi Vincent ushinzwe ubutasi muri RDF yasabye izi ngabo z’u Rwanda gukomeza kwesa imihigo ndetse bagaharanira kuzuza inshingano zabajyanye muri Centrafrica.
Ingabo z’u Rwanda ziri muri Centrafrica mu butumwa bwo kugarura amahoro muri iki gihugu aho boherejweyo n’Umuryango w’Abibumbye, gusa hari n’ingabo zoherejwe n’u Rwanda ku masezerano y’u bufatanye hagati y’ibihugu byombi.
Minisitiri Biruta yari aherekejwe na Brig Gen Nyakarundi Vincent ushinzwe ubutasi muri RDF
Minisitiri Biruta akaba yazishyikirije ubutumwa bwa Perezida Kagame
Ukeneye kwamamaza! Gusobanuza! Gutanga amakuru? Hamagara 0788772818
REBA YouTube Channel UMUSEKE TV video nziza nk’iyi. UKORA LIKE SHARE na COMMENT
NKURUNZIZA Jean Baptiste / UMUSEKE.RW
