Guverinoma ya Kenya yakuyeho itegeko ryo kwambara agapfukamunwa mu bantu benshi ryari rimaze igihe ryarashyizweho mu rwego rwo kwirinda icyorezo cya COVID-19.
Kwambara agapfukamunwa muri Kenya byakuweho (Photo/Internet)
Muri Kenya hari hamaze iminsi impaka zo guhuraho agapfukamunwa nyuma y’uko bigaragaye ko icyorezo cya COVID-19 cyakendereye.
Itangazo ryatangajwe n’Umunyamabanga wa Leta ushinzwe Ubuzima muri Kenya, Mutahi Kagwe, rigira riti “Guhera uyu munsi kwambara agapfukamunwa mu bantu benshi, bikuweho.”
Muri Kenya kandi ubu abantu bikingije mu buryo bwuzuye bemerewe kujya mu bikorwa byose bihuza abantu mu buryo bw’ 100%.
Ingamba zimwe na zimwe zari zimaze igihe zikurikizwa muri Kenya zisa nk’izavuyeho nko gupima umuriro ndetse n’akato.
Mutahi Kagwe yagiriye inama abaturage gukomeza gusukura intoki bakoresheje amazi cyangwa imiti yica udukoko kuko uretse kuba birinda icyorezo cya COVID-19 binarinda izindi ndwara zirimo iziterwa n’umwanda.
Ibihugu bimwe na bimwe byiganjemo ibyo ku mugabane w’u Burayi byagiye bikuraho aya mabwiriza nk’ayo kwambara udupfukamunwa ndetse ubu ibikorwa byajyaga byitabirwa n’umubare muto w’abantu nk’imipira, ubu byitabirwa n’abantu buzuye.
UMUSEKE.RW