Minisitiri w’Uburezi muri Tanzania Prof Adolf Faustine Mkenda yavuze ko abangavu batewe inda imburagihe batemerewe kuzana abana babo mu ishuri n’ubwo bemerewe kwiga kimwe n’abandi kuko byabangamira abandi banyeshuri.
Tanzania abangavu batewe inda babujijwe kuzana impinja mu ishuri
Ibi bivuzwe nyuma y’uko mu gace ka Mbeya hagaragaye umwangavu w’imyaka 19 witwa Esnath Gideon yemerewe kwinjirana mu ishuri uruhinja rwe rw’amezi ane.
Prof Mkenda yavuze ko nubwo Guverinoma ya Tanzania yakomoreye abangavu babyaye gukomeza amasomo yabo, bidasobanuye ko bagomba kuzana impinja mu ishuri.
Esnath Gideon, uwangavu w’imyaka 19 wo mu gace ka Mbeya yafotowe n’umunyamakuru wa BBC ubwo yari mu ishuri ariko anafite umwana mu ishuri, abajijwe avuga ko ntakundi yari kubigenza kubera ko ntamuntu yabona wita ku mwana we w’amezi ane gusa.
Gusa akavuga ko nyuma yo guterwa inda ari mu mwaka wa nyuma w’amashuri yumvise ubuzima bumurangiriyeho ku buryo atatekerezaga ko yabona amahirwe yo kongera kwiga nk’abandi.
Mu kugira icyo avuga kuri ibi, Minisitiri w’Uburezi muri Tanzania, Prof Mkenda Adolf yavuze ko kuzana umwana mu ishuri byabangamira bagenzi be bigana.
Abangavu babyaye igihe kitageze muri Tanzania ntabwo bari bemerewe gukomeza amasomo yabo nk’uko nyakwigendera Perezida John Pombe Magufuli yari yabitegetse, gusa iki cyemezo cyaje guhindurwa nabo bemererwa kugaruka ku ishuri bagakomeza amasomo yabo, ni icyemezo cyo kubemerera kwiga cyafashwe na Perezida Samia Suluhu Hassan.
Nubwo bimeze gutya ariko Guverinoma ya Tanzania ikaba ifite umukoro wo gushakira igisubizo abangavu babyaye ariko badafite abo basigira abana babo ngo nabo bakomeze amasomo yabo.
Mu bana b’abakobwa bagera ku 1,500 batewe inda imburagihe, abagera kuri 240 nibo bamaze kubasha kugaruka kwiga muri Tanzania, gusa inzego z’uburezi ziri gukora ibishoboka ngo abangavu batewe inda babashe kugaruka kwiga.
Kwemererwa kugaruka kwiga nk’abandi n’ibintu byashimishije benshi barimo ababyeyi b’aba bangavu.
NKURUNZIZA Jean Baptiste / UMUSEKE.RW
kazimbaya
February 5, 2022 at 10:17 am
Biratangaje kubona Umwana w’umukobwa ari kumwe n’umwana we mu ishuli.Bamwe bavuga ko umuti wo kubyara kw’Abangavu ari ukubemerera bakaboneza urubyaro.Byaba ari agahomamunwa.Ingaruka ya mbere,nuko ubusambanyi bwakiyongera.Nk’abakristu,dukwiye kwirinda ikintu cyose kijyana ku busambanyi.Umuti waba uwuhe?Mu idini nsengeramo,ababyeyi bigisha abana babo ijambo ry’Imana hakiri kare nkuko Imana ibidusaba muli Gutegeka 6:6,7.Ibyo bituma abana bakura bumvira Imana,bikabarinda ubusambanyi no kubyara.Abo bana b’abakobwa mukunda kubabona bali kumwe n’ababyeyi babo mu nzira,babwiriza ijambo ry’Imana.Nguwo umuti rukumbi w’Abangavu babyara.