Urubanza ruregwamo Béatrice Munyenyezi ukurikiranyweho ibyaha birindwi bifitanye isano na Jenoside yakorewe Abatutsi mu 1994 rwongeye gusubikwa ku nshuro ya kabiri.
Beatrice Munyenyezi ubwo yaburanaga ifunga n’ifungurwa muri Kamena 2021 mu rukiko rw’ibanze rwa Kicukiro
Byari biteganyijwe ko atangira kuburana mu mizi mu Rukiko Rwisumbuye rwa Huye kuri uyu wa 06 Mutarama, 2022. Rwajyanwe i Huye kuko ariho bikekwa ko yakoreye ibyaha aregwa n’Ubushinjacyaha.
Umuvugizi w’inkiko mu Rwanda, Mutabazi Harrison yemereye Umuseke ko uru rubanza rwasubitswe biturutse ku bunganira Beatrice Munyenyenzi.
Mutabazi Harrison yavuze ko ubwo urubanza rwa Munyenyezi rwasubikwaga ku wa 09 Ukuboza, 2021 abamwunganira mu mategeko bahise bandikira Urukiko Rwisumbuye rwa Huye barumenyesha ko itariki urukiko rwanzuye ko urubanza ruzasubukurwa (kuri uyu wa Kane) batazaboneka kuko bafite izindi manza.
Urukiko rwumvuse ubusabe bwabo rwimurira urubanza ku wa 18 Mutarama, 2022 saa mbiri za mu gitondo.
Beatrice Munyennyezi yirukanye Me Gatera Gashabana na Me Buhuru Pierre Celestin bamwunganiye aburana ifunga n’ifungurwa ry’agateganyo mu Rukiko rw’Ibanze rwa Kicukiro, ari banamwunganiye mu Rukiko Rwisumbumbuye rwa Nyarugenge aburana ubujurire, ubu yunganirwa Me Bikotwa Bruce wamenyakaniye mu rubanza rwa Munyagishari Bernard na Twagirayezu Wenceslas na bo baburanye ibyaha bya Jenoside.
Beatrice Munyenyezi akurikiranyweho n’Ubushinjacyaha icyaha cyo kwica n’icyaha cya Jenoside, gucura umugambi wo gukora Jenoside, akurikiranyweho kandi icyaha cy’ubufatanyacyaha muri Jenoside, icyaha cyo kurimbura n’icyaha cyibasiye inyoko muntu.
Beatrice Munyenyezi yagejejwe mu Rwanda ku wa 16 Mata, 2021 akuwe muri Leta zunze ubumwe za Amerika.
Urukiko Rwisumbuye rwa Huye ni rwo ruburanisha urubanza rwa Munyenyezi
REBA YouTube Channel UMUSEKE TV video nziza nk’iyi. UKORA LIKE SHARE na COMMENT
UMUSEKE.RW