Nyanza: Urugereko rwihariye rushinzwe kuburanisha ibyaha mpuzamahanga n’ibyambukiranya imipaka rwongeye gusubika urubanza ruregwamo Urayeneza Gerard na bagenzi be baregwa ibyaha bifitanye isano na Jenoside yakorewe Abatutsi mu 1994 aho baburana mu bujurire.
Urukiko rwasubitse urubanza rw’ubujurire rwa Urayeneza Gerard n’abagenzi be (Archives)
Kuri uyu wa 06/01/2022 hagombaga gusubukurwa urubanza ruregwamo Urayeneza Gerard wahoze ayobora Kaminuza ya Gitwe na bagenzi be.
Ubushinjacyaha bubarega ibyaba bibiri, Kuba Ikitso ku cyaha cya Jenoside yakorewe Abatutsi n’icyaha cyo Kuzimiza cyangwa gutesha agaciro ibimenyetso cyangwa amakuru byerekeye Jenoside yakorewe Abatutsi.
Bose uko ari batanu baburana mu Rukiko bajurira igihano cy’igifungo bahawe, Urayeneza Gerard na Munyampundu Leon alias Kinihira bakatiwe igihano cyo gufungwa burundu.
Naho Rutaganda Dominique, Nsengiyumva Elisee na Nyakayiro Dominique bajuririye igihano bahawe cyo gufungwa imyaka umunani.
https://p3g.7a0.myftpupload.com/urayeneza-gerard-yahanishijwe-igifungo-cya-burundu-yahise-avuga-ko-ajuriye.html
Ibyaha bose baregwa baburana babihakana.
Umunyamakuru wa UMUSEKE wari mu Rukiko saa mbiri n’iminota mirongo ine (8h40 a.m) kuri uyu wa Kane, haje inteko y’Abacamanza batatu bayobowe na Antoine Muhima n’umwanditsi w’urukiko, Ubushinjacyaha bwari buhagarariwe mu rukiko, abaregwa bagaragaraga ku ikoranabuhanga (Video conference).
Urukiko rwavuze ko iburanisha ryongera gusubukwa kuko no ku wa 29 Ukuboza 2021 rwasubitswe kubera ko umucamanza umwe wavuye mu nteko yababuranisha kuko yazamuwe mu ntera akajya mu rundi Rukiko.
Kuri ubu Urukiko rwavuze ko Impamvu y’isubikwa ari uko mu nteko iburanisha abaregwa hiyongereyemo Umucamanza mushya bityo agomba guhabwa igihe akiga kuri dosiye.
Indi mpamvu yatumye urubanza rusubikwa ngo ni uko ubuyobozi bwa Gereza bwatanze itegeko ko abafungwa batagomba gusohoka kubera ko muri gereza hari ubwiyongere bw’icyorezo cya COVID-19.
Urukiko rwo rwari rwarategetse ko abaregwa bagomba kuza kuburanira ku cyiciro cy’Urukiko i Nyanza kubera ubwinshi bw’abitabira urubanza.
Mu maburanisha y’ubujurire aheruka humviswe abatangabuhamya bamwe bashinjaga abaregwa ko bagize uruhare rutaziguye mu byaha baregwa, gusa humvikanye abandi bivuguruje bashinjura abaregwa bavuga ko bahawe inzoga n’ibiryo n’uwitwa Ahobantegeye Charlotte (yahoze akora muri Kaminuza ya Gitwe) ngo bashinje abaregwa.
Urukiko rwavuze ko urubanza ruzasubukurwa mu Cyumweru gitaha ku wa Kabiri taliki ya 11 Mutarama, 2022 mu gihe ryabera ku ikoranabuhanga abunganira abaregwa bakazaba bari ku cyiciro cy’urukiko i Nyanza.
REBA YouTube Channel UMUSEKE TV video nziza nk’iyi. UKORA LIKE SHARE na COMMENT
Theogene NSHIMIYIMANA
UMUSEKE.RW/NYANZA
Rusine
January 6, 2022 at 3:07 pm
Ariko buriya iyo mutagira ahobantegeye muba mwandika iki koko umuntu arashinjwa imibiri yabonetse mubitaro bamwe muti ahobantegeye yabashukishije ibiryo n’inzoga ngo bashinja abaregwa nonese umuntu w’umugabo bamushukisha ibiryo gute? Nanjye ngo umugabo abasaza! Nonese ko muvuga ko babashutse Imibiri ntimuyivuge? Yo ni Charlotte wayishyizemo? Ahubwo iyaba mwavugaga muti Charlotte yatabyemo imibiri arabashuka bavugako Gerard ariwe wayishyizemo byajyaga kumvikana.
Filipo
January 6, 2022 at 6:53 pm
Iteka jenocide iyo irangiye icyiciro cya nyuma Ni ugupfobya no guhakana!!
Niba umuseke Ari ikinyamakuru cya leta y’ubumwe bw’abanyarwanda mwagufasha kubona amakuru ya baliyeli 3 zari hano igitwe?
2.ese gitwe nta muntu wahiciwe?
Niba yarahiciwe yashyinguwe hehe?
3.ese mwatubwira umubare wabakozi bakora hano bafungiwe jenocide
4. Ese amakuru yatanzwe muri gacaca Yaba yarahereye hehe??Gerard baramwanga kugeza aho bacukuriye icyobo mu bitaro bakajugunyamo abantu,bakagisiba bakajya bamenaho ibishingwe!!niyihangane Imana irahari
John
January 7, 2022 at 11:45 am
Ariko ubanza Umuseke hari inyungu zidasanzwe ufite muri uru rubanza rw’i Gitwe
Izi nyandiko z’urudaca ko zitanditswe kuri Rusesabagina ko nawe akomoka hafi y’aho uyu Gerard akomoka?
Ko imanza zihora zisubikwa izi byacitse ni izo iki?
Nimureke ubutabera bukore akazi kabwo uwo icyaha cyizahama azakanirwe urumukwiye
