Imvura ivanze n’umuyaga yaguye ku gicamunsi cyo kuri uyu mbere tariki ya 3 Mutarama 2022, yasenye ibyumba bitatu byo ku ishuri ribanza rya Rebero (Centre Scolaire Rebero) riherereye mu Kagari ka Rusura Murenge wa Busasamana mu Karere ka Rubavu.
Iyi mvura yagurukanye iki gisenge cy’amashuri mashya kuri Centre Scolaire Rebero i Busasamana
Usibye kuba iyi mvura yangije amashuri yanakomerekeje abaturage batandatu bari bahugamye.
Umuyobozi w’Akarere ka Rubavu ,Kambogo Ildephonse, yabwiye UMUSEKE ko bagiye gukora ibyihutirwa amashuri agasanwa , anasobanura uko umuyaga wayasenye.
Ati “Hariya Busasamana ni uruhererekane rw’ikibaya gituruka muri Repubulika Iharanira Demokarasi ya Congo,haguye imvura nyinshi, umuyaga uturuka muri kiriya kibaya ukomeza uza kuri Busasamana ku mashuri ya Rebero ari mu Kagari ka Rusura.”
Yakomeje ati “Ubwo byari mu saa 13h 50 z’igicamunsi, hari abantu 6 bari bugamye muri iryo shuri ry’ibyumba 3,igisenge gitangiye gushaka kugenda bahura nacyo kirabakomeretsa .”
Umuyobozi w’Akarere ka Rubavu yavuze ko icyo gisenge cyakomerekeje batandatu babanje kwitabwaho ariko baza gusubira mu ngo zabo ariko umwe niwe wakomeretse bikomeye wagumye mu Bitaro bya Gisenyi.
Mayor Kambogo yavuze ko ibyumba byasenyutse byari byarubatswe vuba biteganyijwe ko bizigirwamo n’abanyeshuri mu mwaka w’amashuri ugiye gutangira.
Ati “Byari byaruzuye binafunze ariko umuyaga waje nibwo bwa mbere twari tuwubonye wahise ugiterura, uragitwara niyo mpamvu ubu ngubu uretse no ku gisubizaho tukagifunga neza tugomba no gutera ibiti ku mpande kugira ngo bizatugabanyirize ingufu z’umuyaga .”
Yakomeje ati “ Igisenge cyo kirihutirwa tugomba kugisubizaho , kugira abana batazagira ikibazo cyijyanye n’amasomo.”
Ukeneye kwamamaza! Gusobanuza! Gutanga amakuru? Hamagara 0788772818
REBA YouTube Channel UMUSEKE TV video nziza nk’iyi. UKORA LIKE SHARE na COMMENT
TUYISHIMIRE RAYMOND
UMUSEKE.RW