AmakuruMU MAHANGAPOLITIKI

Ukraine: Kuba Amerika igiye gukura Ambasade yayo i Kyiv cyaba ari ikimenyetso cy’intambara iri kuhavugwa?

Nyuma y'uko Canada na Australia zifashe umwanzuro wo gukura ambasade zayo mu mujyi w'i Kyiv, Leta Zunze Ubumwe za Amerika na zo zatangaje ko zishobora kwimura ambasade yayo muri Ukraine ikava mu Murwa Mukuru i Kyiv, kubera ubwoba bw’uko iki gihugu gishobora gushorwaho intambara n’u Burusiya.

Umunyamabanga wa Leta muri Amerika, Antony Blinken yavuze ko kuba hari ibimenyetso simusiga bigaragaza ko u Burusiya bushobora gutera Ukraine, aribyo byatumye igihugu cye gifata umwanzuro wo kwimura ambasade cyari gifite mu Murwa Mukuru wa Ukraine.

Amakuru dukesha BBC na Igihe.com avuga ko Amerika iri gutegura ibikorwa byo kwimura abakozi ba Ambasade yayo muri Ukraine, gusa ntiharatangazwa aho bazajya bakorera.

Uyu mwanzuro wa Amerika ukurikiye uw’ibindi bihugu nka Canada na Australia nabyo byakuye ambasade zabyo i Kyiv bikazijyana i Lviv hafi n’umupaka wa Pologne.

U Burusiya bumaze iminsi burebana ay’ingwe n’ibihugu byo ku Mugabane w’u Burayi na Amerika kuko bubushinja gushaka kwigarurira Ukraine n’ubwo byo bubihakana.

Mu rwego rwo gushakira iki kibazo umuti, Perezida wa Leta Zunze Ubumwe za Amerika, Joe Biden yagiranye ibiganiro na mugenzi we w’u Burusiya Vladimir Putin. Biden yavuze ko mu gihe u Burusiya buzashaka kwigarurira iki gihugu bukwiye kwirengera ingaruka zikomeye buzahura nazo.

Ibi bihugu byose kandi byatangiye gusaba abaturage babyo kuva muri Ukraine igitaraganya, Amerika yo ivuga ko abo intambara izaba bakiri muri iki gihugu itazabona uko ibatabara.

Yanditswe na Dushimimana Elias

Related Articles

Leave a Reply

Your email address will not be published.

Back to top button