AmakuruMU MAHANGAPOLITIKI

Ubwongereza bwemeje ko Johnson Busingye wahoze ari Minisitiri w’Ubutabera n’Intumwa Nkuru ya Leta, azemererwa kuzuza inshingano ze nka Ambasaderi mushya w’u Rwanda muri icyo gihugu

Busingye yahawe izi nshingano ku itariki ya 31 Kanama 2021, ariko ntabwo u Bwongereza bwahise bumuha uburenganzira bwo gukorera muri icyo gihugu, ari nayo nayo mpamvu atari yatangira izo nshingano.

Kimwe mu byadindije uku guhabwa ubu burenganzira, ni ibirego byamushinjaga kugira uruhare mu kwica uburenganzira bwa muntu, cyane cyane ku bijyanye n’igarurwa mu Rwanda rya Paul Rusesabagina n’urubanza rwarikurikiye.

Imwe mu miryango itandukanye yasabye u Bwongereza kwima Busingye uburenganzira bwo gukorera muri icyo gihugu ahubwo agashyirwa ku rutonde rw’abantu bafatirwa ibihano kubera kwica amahame y’uburenganzira bwa muntu.

Icyakora u Rwanda ntirwigeze ruhindura icyemezo rwari rwafashe, ahubwo rwakunze gusobanura ko abitwaza Busingye bagamije guharabika isura y’u Rwanda no kugaragaza Paul Rusesabagina nk’umwere, mu rubanza rwaje kurangira uwo mugabo akatiwe imyaka 25 kubera uruhare yagize mu bitero by’iterabwoba byagabwe ku Rwanda nkuko Igihe kibitangaza dukesha iyi nkuru.

Mu kiganiro na The East African, Ambasaderi w’u Bwongereza mu Rwanda, Omar Daair, yavuze ko Leta ye yamaze kwemeza Busingye.

Yaragize ati “Bishobora gufata igihe kirekire, ibihugu bitandukanye bikoresha igihe gitandukanye mu gukemura ibyo bibazo. Sinshaka kuvuga ku nzira binyuramo [kugira ngo igihugu cyemeze Ambasaderi w’ikindi gihugu] ariko umusaruro wavuyemo ni uko uwashyizweho na Leta y’u Rwanda yemejwe [na Leta y’u Bwongereza].”

Yavuze ko igisigaye ari uko Busingye ajya mu Bwongereza gutangira inshingano yahawe, kandi ko yiteguye gukorana nawe kimwe n’izindi nzego zose.

Abajijwe niba gutinda gutanga uburenganzira kuri Busingye bifitanye isano n’urubanza rwa Rusesabagina, Daair yavuze impungenge bagize kuri urwo rubanza baziganiriyeho na Leta y’u Rwanda.

Ati “Umuryango wa Amnesty Ishami rya Afurika wavuze ku mugaragaro ku rubanza rwa Rusesabagina, hagombaga guhanwa abagize uruhare mu bitero byagabwe [mu Rwanda] mu 2018 na 2019. Twebwe, kimwe n’abandi bafatanyabikorwa, twagize impungenge ku buryo urubanza rw’icyo kirego rwagenze, kandi izo mpungenge twazigejeje kuri Guverinoma tuziganiraho.”

Johnson Busingye agiye guhagararira u Rwanda mu Bwongereza asimbuye Yamina Karitanyi wahawe inshingano zo kuyobora Ikigo gishinzwe Mine, Peteroli na Gaz (RMB).

Yanditswe na Dushimimana Elias

Related Articles

Leave a Reply

Your email address will not be published.

Back to top button