AmakuruAMATEKA

Shefu Rwabutogo uri mu batware bo mu Rwanda babatijwe bwa mbere yagize uruhare rukomeye mu iyubakwa rya Kiliziya ya Paruwasi ya Rwamagana

Iyi foto yafatiwe i Rwamagana mu kwezi kwa Mata mu mwaka w'1933 igihe hubakwaga Kiliziya ya Paruwasi ya Rwamagana,uyu mugabo ugaragara kuri iyi foto uteze amasunzu ni Umutware watwaye u Buganza, Shefu Rwabutogo Fransisko,umuhungu wa Kabare mwene Rwakagara.

Shefu Rwabutogo uri mu batware bo mu Rwanda babatijwe bwa mbere yagize uruhare rukomeye mu iyubakwa rya Kiliziya ya Paruwasi ya Rwamagana (ari nayo agaragara kuri iyi foto ari kubaka)

Ifite yakuwe kuri Murandasi

Uruhare mu kuyubaka yarugize ubwo yasabaga abagaragu be n’abaturage b’aho yatwaraga ngo bamufashe kuyubaka gusa Shefu Rwabutogo abonye bagize ubunebwe bwo kubikora nibwo yafashe ingata ashyira ku masunzu ye ku mutwe yikorera amatafari,abari babisuzuguye bagira isoni babona ko ishyano riguye maze barakenyera batunda amabuye n’amatafari barubaka kugeza inyubako ya kiliziya yuzuye.

Ubutaka bwubatseho Kliziya,amashuri ndetse n’ibindi bigo bishamikiye kuri paruwasi, bwatanzwe na Shefu Rwabutogo.

Imwe mu mitako igaragara muri Kiliziya inahamaze igihe kinini yashushanyijwe na Shefu Rwabutogo ubwe

Kiliziya ya Paruwasi ya Rwamagana yatashywe ku mugaragaro tariki ya 3 Ukuboza mu mwaka w’1934

Shefu Rwabutogo azwi kandi kuba yaraherezaga mu Misa z’iminsi Mikuru nka Noheli,Pasika n’umunsi w’Isakaramentu.

Mu buhereza bwe yayoboraga abatwara amatara mu gihe cya consécration.Yabaga ari Cérémoniaire,agafatanya n’ibisonga bye(aba sous chefs)barimo uwitwa Ruhorahoza Gérard icyo gihe wari Sous shefu w’i Nyarusange,Rugumire Antoine wari sous shefu wa Nyarubuye ndetse na Mutsinzi Michel wari sous shefu wa Nkomangwa.

Shefu Fransisko Rwabutogo yanditse kandi igitabo ku Isakaramentu ry’ugushyingirwa cyitwa Ugushyingirwa Gutagatifu,gikubiyemo Inama zerekeye abasore n’abakobwa bashaka guhabwa Isakaramentu ry’Ugushyingirwa.

Mu rwego rwo kumushimira uruhare rw’indashyikirwa yagaragaje mu kurwanira ishyaka Kiliziya,Papa Piyo wa XII yamushyize mu rugaga rw’abalayiki b’imena bagize uruhare mu kurwanira ishyaka Kikiziya Gatolika,mu kuyirengera no mu bindi bikorwa by’indashyikirwa,urwo rugaga rwitwa: «Chevalier de l’Ordre Pontifical de Saint Sylvestre ».

Uyu mudari w’ishimwe uzwi ku izina rya “Chevalier de l’Ordre Pontifical de Saint Sylvestre” niwo
Shefu Rwabutogo yahawe kubera uruhare yagize mu kurwanira ishyaka Kiliziya Gatolika,mu kuyirengera no mu bindi bikorwa by’indashyikirwa byamuranze ubuzima bwe bwose

Yahawe Umudari w’ishimwe waherekejwe no kumushyira muri urwo rwego awambikwa ku mugaragaro ku itariki ya 30 Kamena mu mwaka w’1940 i Rwamagana ari ku munsi wo ku Cyumweru.

Ikindi cy’ingenzi benshi bibukira ku Mutware Rwabutogo nuko Umwami Rudahigwa yakundaga kumwirahira akenshi agira ati: “Yampaye inka Rwabutogo” cg akamwirahira agira ati:” Mba ndoga Rwabutogo”,yirahiraga Shefu Rwabutogo kuko ariwe wari waramugabiye amashyo y’inka igihe yari atarima ingoma(icyo gihe Umwami Rudahigwa yari yaranyazwe na Nyirarume Kayondo ka Mbanzabigwi bya Rwakagara batumvikanaga wanakundaga kumubwira ko umunsi azima ingoma azimuka..

Umutware Rwabutogo yitabye Imana mu kwezi kw’ukuboza mu mwaka w’1945.

Paruwasi Gatulika ya Rwamagana yashyizeho umunsi wo kumwibuka tariki ya 26 Ukuboza buri mwaka

Byakuwe ku rukuta rwa Facebook rwa Imfura Loïc

Related Articles

Leave a Reply

Your email address will not be published.

Back to top button