AmakuruPOLITIKI

Perezida Paul Kagame yakiriye mu biro bye abanyamuryango b’Ihuriro Mpuzamahanga ry’Ibigo by’Imari, WAIFC

Perezida wa Repubulika, Paul Kagame yabonanye n’abanyamuryango b’Ihuriro Mpuzamahanga ry’Ibigo by’Imari rizwi nka World Alliance of Financial Centers, aho bari mu Rwanda mu nama yabo ya 3 y’ubuyobozi. U Rwanda rwinjiye muri uyu muryango muri 2020 kandi rwashyizeho ubufatanye n’ibigo by’imari hirya no hino mu mahanga

Rwanda Finance Limited ishizwe guteza imbere Ikigo Mpuzamahanga cya Kigali gishinzwe Ibikorwa by’Ubucuruzi n’Imari (KIFC), cyinjiye muri WAIFC mu Ukwakira 2020.

Iki kigo cyahise kiba umunyamuryango wa gatatu w’iri huriro ukomoka muri Afurika, nyuma ya Casablanca Finance City na EDB Mauritius.

Mu butumwa yanyujije kuri twitter, Perezidansi y’u Rwanda yavuze ko kuva mu 2020 u Rwanda “rumaze kubaka ubufatanye n’ibigo by’imari bya Casablanca, Qatar, u Bubiligi, Luxembourg na Jersey.”

Mu mwaka ushize KIFC yatangaje ko hashinzwe ikigega cya miliyoni $250 cyiswe Virunga Africa Fund I, kigiye gushora imari mu nzego zitandukanye zizihutisha ubukungu n’imibereho by’abatuye Afurika.

Iki kigega cyashowemo imari n’ibigo bibiri: Ikigo cy’Ishoramari cya Leta ya Qatar (Qatar Investment Authority, QIA) n’Urwego rw’Ubwiteganyirize mu Rwanda (RSSB). Kizacungwa n’ikigo Admaius, gifite ibikorwa byinshi muri Afurika.

WAIFC yashingiwe i Paris mu 2018, intego yayo ni iyo koroshya ubufatanye mu guhagararira ikigo kinini cy’imari ku Isi.

Mu mwaka wa 2016, ibigo by’imari bya Paris, Frankfurt na Moscou byasabye ko hashyirwaho ishyirahamwe ridaharanira inyungu kugira ngo ryorohereze ubufatanye no guteza imbere imikorere myiza no kungurana ibitekerezo n’abayobozi mpuzamahanga.

Nyuma y’imyaka ibiri iryo shyirahamwe ryashinzwe nka World Alliance of Financial Centers i Paris kandi ryanditswe ku ya 1 Ukwakira 2018 mu Mujyi wa Buruseli, rishinzwe n’ibigo by’imari 11 byo mu bihugu nk’u Budage, u Bufaransa, u Bubiligi, u Burusiya, Canada na Leta Zunze Ubumwe z’Ubumwe z’Abarabu.

Yanditswe na Dushimimana Elias

Related Articles

Leave a Reply

Your email address will not be published.

Back to top button