AmakuruPOLITIKI

Ntawe twifuriza umutekano muke, nta n’uwo twifuriza amahoro make ariko utwifurije intambara nawe turayirwana

Kuri uyu wa kabiri Umukuru w'Igihugu cy'u Rwanda Nyakubahwa Paul Kagame yatangaje ko hari icyizere ko mu minsi iri imbere umubano w’u Rwanda n’ibindi bihugu byo mu karere uzongera kuba mwiza. Akaba yabivuze mu gihe umubano hagati y’igihugu cy'u Rwanda, Uburundi ndetse na Uganda wari umaze igihe utameze neza cyane. Perezida wa Repubulika Paul Kagame yabitangaje ubwo yakiraga indahiro z’abinjiye muri guverinoma bashya. Akimara kwakira indahiro z’abayobozi bakuru bashya muri guverinoma Perezida Paul Kagame ni bwo yongeye kugira icyo avuga ku mibanire y’u Rwanda n’amahanga. Akaba ari umuhango wabereye mu ngoro y’inteko ishinga amategeko.

Perezida Kagame yatanze icyizere cy’ukuzahuka k’umubano w’u Rwanda n’u Burundi; ati “Ngira ngo mu bihe biri imbere umubano uraza kugenda urushaho kuba mwiza n’Abarundi n’Abanyarwanda babane uko byari bisanzwe.”

Ku mubano w’u Rwanda na Uganda, Perezida Kagame yavuze ko hari hari ibibazo byatumye umupaka wa Gatuna ufungwa, ariko ibiganiro byamuhuje n’Intumwa ya Perezida Museveni, Gen Muhoozi Kainerugaba byasize bemeranyije ko impamvu zatumye ufungwa zikurwaho.

Ati “Ikibazo iteka cyari ukuvuga ngo uyu mupaka ntushobora gufungwa, ibyatumye ufungwa bitabanje gukemurwa. Hanyuma muri iyi minsi ishize, habaho uburyo Abanya-Uganda batumye intumwa ariko hari n’izindi zari zisanzwe ziza hakaba impaka gusa zitagira ruca.”

“Iyo ntumwa yazanye ubwo butumwa mu biganiro twumvikana ko hari ibyo twese twakora. Ariko njye nkomeza kuvuga ko gufungura umupaka ni byiza ariko gufungura umupaka udakemura ikibazo cyatumye umupaka ufungwa ntabwo byakunda. Habaho kwemeranya ko n’ibyateye umupaka gufungwa nabyo bigiye kwitabwaho.”

Ati “Umupaka twarawufunguye, muri Uganda nabo hari ibyo batangiye gukora bigaragara ko bavana za nzitizi mu nzira, bya bindi byatumye umupaka ufungwa. Turabikurikira, tubiganira nabo, ndibwira ko nabyo turi mu nzira nziza.”

Ku bijyanye na Mozambique, Perezida Kagame yavuze ko Inzego z’umutekano z’u Rwanda kuva zagerayo muri Nyakanga 2021 zagize uruhare mu gutuma igice kinini cya Cabo Delgado kibona umutekano, aho bigeze ku kigero cya 85%.

Ati “Ingabo z’u Rwanda, Abapolisi, izindi nzego zose zagiyemo zikorana n’ingabo za Mozambique […] nka 85% [ikibazo] cyarakemutse, 15% uduce duto tw’aba bantu basigaye, bahunze bajya mu bindi bice batari barimo ubu barabakurikirana nabo kugira ngo naho bahasukure neza.”

Perezida Kagame yagaragaje ko mu bibazo u Rwanda ruhanze amaso harimo n’ibibera muri RDC.

Ati “Ikibazo duhanzeho amaso ni icyo muri Congo […] Kubera FDLR n’indi mitwe ishobora kuvanga na ADF. Ibyo tubihanze amaso ariko tuzabikemura uko bikwiriye kuba bikemuka.”

“Hari aho twinginga, hari aho twumvikana, hari aho dusaba hari n’aho iyo byarenze umurongo tutagira uwo dusaba tugakemura ikibazo uko gikwiye gukemuka.”

Perezida Kagame yavuze ko abantu bose barwanya u Rwanda yaba abari mu gihugu no hanze yacyo, “nta kintu na kimwe bashobora kugeraho.” Ati “Icyo bageraho ni iminsi yabo iba ibaze bagenda begera nta kindi”.

 Perezida Kagame avuga ku mutekano w’Igihugu

Ntawe twifuriza umutekano muke, nta n’uwo twifuriza amahoro make ariko utwifurije intambara nawe turayirwana. Ibyo nta kibazo rwose, dufite abanyamwuga babikora uko bikwiriye. Haba hano haba n’ahandi.

 

 

 

Related Articles

Leave a Reply

Your email address will not be published.

Back to top button