MU MAHANGAPOLITIKI

Ninde wababwiye ko ntaziyamamaza?: Perezida Suluhu

Perezida Samia Hassan Suluhu uyoboye Tanzania kuri ubu yaciye amarenga ko ashobora kuziyamamariza kuyobora Tanzania mu matora azaba mu 2025, nyuma yuko kuri ubu ayoboye igihugu kubera ko yari visi perezida wa Dr John Pombe Magufuli waje kwitaba Imana mu ntangiriro zuyu mwaka azize umutima.

Ibi Perezida Samia Suluhu yabigaragarije mu ijambo yavuze ubwo hizihizwaga Umunsi Mpuzamahanga wa Demokarasi. Ni ibirori byabereye muri ‘Nyerere International Convention Centre’ mu Mujyi wa Dar es Salaam.

Suluhu yahawe inshingano zo kuyobora Tanzania nyuma y’urupfu rwa Dr John Pombe Magufuli kuko ariko byateganywaga n’Itegeko Nshinga. Yavuze ko mu matora ya 2025 haziyamamaza abagore kandi muri bo hakagira utorwa.

                       Samia Suluhu Hassan yaciye amarenga ko ashobora kwiyamamaza mu 2025.

Ati “Abagore ntibaratora Perezida w’umugore, icyo twagerageje ni ukugira Visi Perezida w’umugore kandi uyu Perezida (yivuga) ayoboye kubera ko byifujwe n’Imana kandi bikaba byaragenwaga n’Itegeko Nshinga.”

Samia Suluhu yayoboye Tanzania kuko Itegeko Nshinga ry’iki gihugu rigena ko igihe Perezida apfuye cyangwa akaba atagishoboye kuzuza inshingano ze asimburwa na Visi Perezida, umwanya wari urimo uyu mugore.

Perezida Samia Suluhu yakomeje avuga ko abagore bo muri Tanzania bakwiye gutahiriza umugozi umwe kugira ngo bazabonekemo umwe ubayobora.

Ati “Abagore, nituramuka dufatanyije tugakora neza inshingano dufite, mu 2025 tuzagaruka aha twishimire umwe muri twe uzaba wabaye Umukuru w’Igihugu.”

“Batangiye kwandika mu binyamakuru ko Samia atazahatana ku mwanya wa Perezida, ni nde wababwiye ko ntaziyamamaza ? Ineza y’Imana ni ukugera mu biganza ntuzayirengagize.”

Magufuli yitabye Imana muri Werurwe 2021 nyuma y’igihe gito atorewe kuyobora Tanzania muri manda ya kabiri yagombaga kurangira mu 2025.

Ibi bivuze ko Samia Suluhu wamusimbuye ariwe ugomba kuyobora kugeza iki gihe, ubundi hakazaba amatora y’Umukuru w’Igihugu ashobora kwiyamamazamo mu gihe yaba abishaka cyangwa ntabikore.

Related Articles

Leave a Reply

Your email address will not be published.

Back to top button