AmakuruMU MAHANGAPOLITIKI

Ndakwifuriza gukira Covid-19 vuba Muvandimwe : Perezida Kagame abwira Perezida wa Afurika y’Epfo Ramaphosa

Nyakubahwa Perezida wa Repubulika y’u Rwanda, Paul Kagame abinyujije ku mbugankoranyambaga akoresha yifurije mugenzi we wa Afurika y’Epfo Nyakubahwa Cyril Ramaphosa gukira Covid-19 vuba.

Perezida Ramaphosa yasanzwemo Covid-19 ku Cyumweru, tariki 12 Ukuboza 2021, ndetse ahita ashyirwa mu kato, aho ari gukurikiranwa n’abaganga.

Ati “Nkwifurije ibyiza muvandimwe Perezida Cyril Ramaphosa, ukire vuba.”

Ubwo byatangazwaga bwa mbere ko Perezida Ramaphosa yanduye Covid-19, Perezidansi ya Afurika y’Epfo yatangaje ko inshingano ze yabaye azisigiye Visi Perezida, David Mabuza, kugeza mu cyumweru gitaha.

Bivugwa ko Perezida Ramaphosa yatangiye kumva atameze neza avuye mu bikorwa byo kwibuka uwahoze ari Perezida FW de Klerk i Cape Town.

Amakuru yatangajwe na CNN, avuga ko Perezida Ramaphosa washyizwe mu kato i Cape Town, yatangiye guhabwa serivisi z’ubuvuzi n’Ibitaro bya Gisirikare muri iki gihugu.

Perezida Ramaphosa yavuze ko kuba yanduye ari ikimenyetso cy’impuruza ku baturage bose ko bakwiye kwikingiza kandi bakaguma kuba maso birinda kuko kwikingiza ari bwo buryo buboneye bwo kurwanya iyi ndwara.

Muri Afurika y’Epfo ni ho abahanga muri siyansi baherutse kuvumbura ubwoko bwa Covid-19 yihinduranyije, Omicron, iki gihugu kikaba cyarinjiye mu nkubiri ya kane ya Covid-19.

Abagera kuri 25% muri Afurika y’Epfo ni bo bamaze gufata urukingo mu buryo bwuzuye mu gihe abakingiwe by’igice ari 5%. Ramaphosa nubwo yanduye yari yamaze kwikingiza mu buryo bwuzuye.

Hashize iminsi mike agiriye uruzinduko mu Burengerazuba bwa Afurika ariko akimara gusubira mu gihugu cye yapimiwe i Johanesburg ku wa 8 Ukuboza ntiyasanganwa ubwandu bwa Covid-19.

Related Articles

Leave a Reply

Your email address will not be published.

Back to top button