UBUKERARUGENDO

Mwaka wa 2019, u Rwanda rwakiriye ba mukerarugendo basaga 1,634,000

Ikinyamakuru TradingsEconomics.com giherutse gutangaza ko muri raporo ya Banki y’isi ya 2019 igaragaza ko u Rwanda rwakiriye ba mukerarugendo basaga 1,634,000 muri uwo mwaka gusa kandi ko ari imwe mu nkingi ifatiye runini ubukungu bw’u Rwanda muri iki gihe gisaga imyaka 20 utangiye kubara uhereye mu 2000.

Iyo tuvuze ubukerarugendo na ba mukerarugendo baturutse hanze ni ingingo ikurura benshi dore ko ari imwe mu nzira zibasha gutanga agatubutse haba ku gihugu ndetse no ku baturarwanda muri rusange dore ko amafaranga avamo arimo ashyirwa mu bikorwa remezo, mu buvuzi ndetse n’ibikorwa by’iterambere.

Mu mujyi wa Kigali hamaze kuzura Pariki ya Nyandungu nyuma yuko hari ibikorwa byabangamiraga urusobe rw’ibinyabuzima ndetse n’ibimera biherereye mugishanga cya Nyandungu, ubuyobozi bwa REMA bwagize uruhare mu itunganywa ryiki gishanga busobanura ko hari n’ibindi bishanga bizavugururwa ku buryo byaberamo ubukerarugendo.

Mu 2015 ikigo cy’igihugu gishinzwe iterambere (RDB) mu mikoranire na African Parks babashije kugarura Intare mu Rwanda nyuma y’imyaka isaga 10 zarazimye muri pariki y’Akagera ikaba ariyo nini mu Rwanda, nyuma haza kuzanwa Inkura (Rhinoceros) z’umukara zikuwe muri Czech Republic zihita zuzuza icyitwa Big 5 arizo nyamanswa z’amoko atanu zikurura ba mukerarugendo benshi arizo Intare, Imbogo,Inzovu,Inkura ndetse n’Ingwe.

Hari kandi Pariki ebyiri zarangije gutunganywa zombi ziherereye mu Ntara y’Uburengerazuba ariko Ishyamba rya Gishwati ndetse n’irya Mukura ziyongera kuri Pariki y’Igihugu y’ibirunga ndetse na Pariki ya Nyungwe.

Si aho gusa ho gusura mu Rwanda haba ku banyarwanda ndetse n’abanyamahanga dore ko u Rwanda ari kimwe mu bihugu bifite ahantu henshi nyaburanga buri muntu yasura harimo ibigabiro by’abami ndetse n’imisezero yabo, ingoro y’inteko ishinga amategeko aho kuri ubu harimo Inzu ndangamurage y’urugamba rwo kubohora Igihugu ndetse no guhagarika Jenoside yakorewe Abatutsi mu 1994.

Mu mujyi wa Kigali hari kandi Richard Kandt Museum iherereye mu mujyi rwagati aho bivugwa ko Rezida w’umudage Richard Kandt yari atuye anahafite ikicaro, ni inzu uzasangamo byinshi bya mbere y’ubukoloni mu gihe cy’ubukoloni ndetse na nyuma yuko abadage bavuye mu Rwanda mu 1916.

Mu majyepfo y’igihugu naho hari ibice byo gusurwa birimo Ingoro y’Umwami Mutara III Rudahigwa ndetse n’inzu za Kera z’abanyarwanda zigaragaza umuco ndetse unasanagayo Inyambo ziteye ubwuzu, mu birometero bike ugana mu Majyepfo winjira mu karere ka Huye ahari Inzu ndangamurage y’u Rwanda (Ethynograph National Museum) ahari umugogo wa Cyilima II Rujugira ndetse n’inigi ze n’ibindi byose byakuwe aho yari yaratabarijwe.

Mu nkuru yacu itaha ijyanye n’ubukerarugendo tuzagenda twibanda kuri buri gace kagiye kavugwa muri iyi nkuru ku buryo bwihariye.

Related Articles

Leave a Reply

Your email address will not be published.

Back to top button