AmakuruKWIBUKAMU MAHANGAPOLITIKI

Muri Sweden Hashinzweyo Umuryango IBUKA ubaye uwa karindwi mu mahanga

Umuryango uharanira inyungu z’abarokotse Jenoside yakorewe Abatutsi, IBUKA, wagukiye muri Suède, uje wiyongera ku yindi miryango ikorera mu bihugu bitandukanye ku Isi.

Ibuka-Sweden ifite icyicaro mu Murwa Mukuru w’icyo gihugu, Stockholm. Ni umuryango wiyongereye ku yindi nka Ibuka-Belgique, Ibuka-Suisse, Ibuka-Italie, Ibuka-Hollande, Ibuka -France, Ibuka-Allemagne, Ibuka-USA, Ibuka-Sénégal na Ibuka-Rwanda.

Kanamugire Josiane niwe wahawe inshingano zo kuwuyobora

Ibuka-Sweden ibaye umuryango wa karindwi ku mugabane w’u Burayi.

Nyuma yo gushingwa hatowe Komite nyobozi igizwe n’Umuyobozi Kanamugire Josine wungirijwe na Michel Hitimana, Dévote Mukeshimana ni umunyamabanga naho Françoise Moti yatorewe umwanya w’umubitsi.

Kanamugire Josine yungirijwe na Michel Hitimana

Kanamugire Josine uyobora Ibuka- Sweden mu kiganiro yagiranye na IGIHE yavuze ko kwibumbira mu muryango umwe bizabafasha gukomeza gufatanya mu bikorwa bitandukanye birimo kwibuka abazize Jenoside yakorewe Abatutsi.

Ati “Tumaze guhura twasanze dukeneye gushyira hamwe imbaraga zacu tugashaka inzira twakoreramo kugira ngo tubashe gukomeza kwibuka abacu bazize Jenoside yakorewe Abatutsi mu 1994, tubivuge nk’abantu babibayemo, babizi, tuvuge amateka yacu.”

Kanamugire yavuze ko bizanaborohereza gukomeza kwigisha amateka ya Jenoside yakorewe Abatutsi.

Ati “ Bizadufasga nko mu mashuri twigishe amateka nyayo, turwanye Jenoside aho yava ikagera, umuryango Ibuka ni urubuga rwo kuvugiramo mu gihe hari abantu bashaka gupfobya Jenoside yakorewe Abatutsi.

Tuzafatanya kandi kurwanya abakoze Jenoside bari kwidegembya aha hanze mu bihugu bitandukanye dukore n’ibindi bikorwa bijyanye n’uyu muryango dufatanyije twese.”

Kanamugire yagiriye inama abandi banyarwanda batuye mu Burayi bw’Amajyaruguru kwishyira hamwe bagashinga imiryango igamije kubungabunga amateka ya Jenoside yakorewe Abatutsi mu gufatanyiriza hamwe icyo gikorwa.

Françoise Moti, umubitsi wa Ibuka-Sweden

Mu bikorwa by’ibanze Ibuka- Sweden igiye guheraho harimo gutegura kwibuka Jenoside yakorewe Abatutsi ku nshuro ya 28 nkuko Igihe kibitangaza dukesha iyi nkuru.

Kanamugire ati “Turi gufatanya na Komite y’Abanyarwanda muri Suède mu gutegura kwibuka ku nshuro ya 28. Tuzibuka tariki ya 9 Mata. Tuzatangira dukora urugendo rwo kwibuka, tunatangiza umuhnago wo kwibuka nk’uko bisanzwe.”

Yashimiye abantu bose bagize uruhare kugira ngo Ibuka- Sweden ibeho, abasaba ubufatanye kugira ngo ikomeze inshingano zayo uko bikwiriye.

Yanditswe na Dushimimana Elias

Related Articles

Leave a Reply

Your email address will not be published.

Back to top button