Amakuru

Minisante yafunze ibitaro bya BAHO

Nyuma yuko hashize iminsi havugwa imitangire mibi ya serivisi mu bitaro byitwa Baho International Hospital, Minisiteri y’ubuzima yafashe umwanzuro wo gufunga ibi bitaro.

Mu minsi ishize havuzwe umurwayi witabye Imana mu gihe yarimo abagwa muri ibi bitaro ndetse kuri ubu Minisante na RIB bakaba baratangiye iperereza kugirango hatahurwe impamvu uwo murwayi yapfiriye ku iseta muri ibyo bitaro.

Amakuru atugeraho aravuga ko nyuma y’icyumweru hakorwa iperereza aribwo umwanzuro wo gufunga ibyo bitaro wafashwe, nubwo nta byinshi biratangazwa ariko bivugwa ko mu igenzurwa ryakozwe hanarebwe niba ibyo bitaro mu byukuri abakozi basanzwe babikoramo bafite ibyangombwa byuzuye bibemerera gukora umwuga wo kuvura.

Ndetse hanarebwe ku bikoresho byifashishwa nibyo bitaro, imiti ndetse naho ibikwa kugenzura inyubako ikorerwamo nibyo bitaro, niba se ikibazo cyaba kiri mu miyoborere ku buryo harebwa uko ibibazo byakemuka ndetse no kureba icyerekezo cy’ibitaro muri rusange na serivisi z’ubuvuzi bitanga.

Isuzuma ryakozwe ryanarebye ku isuku n’umutekano. Niba ibitaro bifite amazi meza cyangwa se niba bifite uburyo bwo kurwanya inkongi mu gihe yaba ibaye.

                       Minisante yafashe umwaznuro wo gufunga ibitaro bya Baho.

Ibyavuye muri iryo genzura nibyo byagendeweho hanzurwa ko ibitaro bifunzwe. Mu gukora ubucukumbuzi, harebwe mu gihe cy’imyaka ibiri, umubare w’abitabye Imana, uko byagenze, gusa “byagaragaye ko hari amakosa yakozwemo”.

Minisante ifite gahunda yo gukora igenzura no mu bindi bitaro ireba niba ubuvuzi butangwa mu buryo buboneye.

Baho International Hospital ni bimwe mu bitaro byigenga mu Rwanda. Byatangiye mu 2015, bivugwa ko byari birimo kubaka inyubako nshya byiteguraga kwimurirwamo.

Ibi bitaro kandi byari biherutse gukorerwa igenzurwa na Minisiteri y’Ubuzima nyuma y’uko hari abantu bagaragaje ko bidafite isuku ihagije.

Amakuru avuga ko ibi bitaro byari byarajyanywe mu nkiko kubera impfu ebyiri zabereyeyo, mu gihe byari biherutse gutsinda izindi manza enye byari byararezwemo uburangare.

Related Articles

Leave a Reply

Your email address will not be published.

Back to top button