UBUKERARUGENDO

Menya byinshi kuri Nyanza igicumbi cy’umuco

Kuri ubu akarere ka Nyanza niko cyicaro cy’Intara y’Amajyepfo y’u Rwanda (Administrative Capital of Southern Province), Umujyi wa Nyanza ushyirwa ku mwanya wa munani mu bunini nta gitangaje Nyanza yahoze ari umurwa mukuru w’u Rwanda ku ngoma ya Yuhi V Musinga wakuwe ku ngoma n’abakoloni b’ababiligi mu 1931.

Nyanza izwiho byinshi cyane mu byaranze u Rwanda haba mu butegetsi ndetse n’umuco, utiyibagije ko ari inzira yerekeza mu bihugu bituranye n’u Rwanda nka RDC ndetse n’u Burundi, akarere ka Nyanza kazwiho kuba ari inkomoko y’ikipe nka Rayon Sports ikunzwe cyane mu banyarwanda nubwo nta bushakashatsi burakorwa ariko ibigaragarira amaso birabyerekana.

Nyanza ifite ubuso bwa kilometero kare 671.2, gafite imirenge 10 utugari 51 ndetse n’imidugudu ndetse n’imidugudu 420, mu ibarura rusange ry’abaturage Akarere ka Nyanza kari gatuwe n’abaturage basaga 671,200 ubucucike kuri kilometero kare imwe ni abaturage 480 nkuko bigaragara ku rubuga rwako karere.

Yuhi V Musinga na Nyina Kanjogera.

Nyanza ni igicumbi cy’ubukerarugendo bufitiye akamaro ubukungu bw’igihugu ndetse kuri ubu ni hake muho wasanga inka z’inyambo, bimwe mu bikoresho byakoreshwaga n’abanyarwanda bo hambere ndetse n’ibindi mu biranga umuco wa kinyarwanda.

Uretse ibyo kandi i Nyanza mu Rukari muri make i bwami uhasanga inyubako y’ibwami mu bihe bya kera ndetse n’ingoro ya Nkubito y’Imanzi umwami Mutara III Rudahigwa ni inyubako usura ugasobanurirwa byinshi ku ngoma ye ndetse niya se umwami Musinga.

Mu Rukari ni hamwe muho wasanga Inyambo.

Mu 1899, Yuhi V Musinga yagize Nyanza umurwa uhoraho w’u Rwanda nubwo abakoloni bari barageze mu gihugu, ariko mbere ntabwo umwami yagiraga aho atura ngo ahagume iteka ryose byitwa ko ari umurwa mukuru, Nyanza yagumye kuba umurwa mukuru w’ubwami kugeza ubwo u Rwanda rwabonye ubwigenge ndetse rugahinduka Repubulika mu 1962.

Mu Rukari ahari inzu ya kinyarwanda ya kera iyo uyitegereza ubona ko abanyarwanda ba kera bari abahanga mu kubaka ndetse no mu bikorwa byo kubungabunga inyubako zabo kugirango zitagwa cyangwa se imvura ikaba yabageraho.

Ku nzu za kera z’abanyarwanda ukigera ku marembo wahasangaga ibiti bibiri byabaga ari Umuko wafatwaga nk’umurinzi ndetse n’umuvumu bikaba byari umuco kuri buri munyarwanda.

Related Articles

Leave a Reply

Your email address will not be published.

Back to top button