AmakuruKWIBUKA

Kwibuka28: ku rwibutso rwa Musha i Rwamagana hashyinguwe mu cyubahiro imibiri 21 yabonetse

Kuri uyu wa Gatatu tariki ya 13 Mata 2022, ubwo hazozwaga icyumweru cy’icyunamo i Rwamagana, hibutswe Abatutsi biciwe i Musha, hanashyingurwa mu cyubahiro imibiri 21 yabonetse.

Ni umuhango wabereye mu busitani bw’urwibutso rwa Jenoside yakorewe Abatutsi mu 1994 rwa Musha, witabirirwa na Minisitiri w’Ikoranabuhanga na Inovasiyo, Ingabire Paula wari umushyitsi mukuru, ari kumwe na Guverineri w’Intara y’Iburasirazuba, CG Emmanuel Gasana, Abasenateri n’Abadepite batandukanye, abagize komite nyobozi y’Akarere ka Rwamagana, n’abahagarariye inzego z’umutekano; aho bifatanyije n’Abaturage b’Akarere ka Rwamagana mu kwibuka ku nshuro ya 28 Abatutsi biciwe i Musha muri Jenoside yakorewe Abatutsi mu 1994.

Uyu muhango witabiriwe n’abayobozi batandukanye barangajwe imbere na Minisitiri Minisitiri w’Ikoranabuhanga na Inovasiyo, Ingabire Paula wari umushyitsi mukuru.

Muri iki gikorwa kandi abanya-Rwamagana bifatanyije n’itsinda riturutse mu murenge wa Rutare ho mu karere ka Gicumbi ryari riherekejwe n’Umuyobozi w’Akarere ka Gicumbi wungirije ushinzwe imibereho myiza y’abaturage, Bwana Mbonyintwari J.M.V.

Agaragaza ishusho y’uburyo interahamwe zishe Abatutsi ku kiliziya i Musha, Meya Mbonyumuvunyi Radjab yavuze ko Jenoside yakorewe Abatutsi mu 1994 i Musha yatangiye ku buryo bweruye guhera tariki ya 07 Mata 1994, kuko ari bwo Abatutsi batangiye guhungira ku kiliziya ya Paruwasi gatulika ya Musha, abayobozi bazenguruka mu ngo z’Abatutsi babasaba guhungira ku kiliziya ariko ari ukugira ngo babahurize hamwe bose hatazagira ubacika nkuko Umusare ubitangaza dukesha iyi nkuru.

Yakomeje avuga ko interahamwe zimaze kubona ubwinshi bw’Abatutsi bahungiye kuri iyo kiliziya, Burugumesitiri Bisengimana Paul wayoboraga komini Gikoro afatanyije na Semanza wayoboraga komini Bicumbi bazanye abasirikare n’abapolisi barasa amasasu na Gerenade, hanyuma interahamwe nazo zigenda zitema abatashizemo umwuka zikoresheje intwaro gakondo.

Meya Mbonyumuvunyi yavuze kandi ko hagamijwe gusibanganya ibimenyetso, tariki ya 14 Mata 1994, i Musha haje amakamyo menshi apakira imibiri y’Abatutsi bari biciwe kuri Kiliziya ya Musha, bajya kuyijugunya mu byobo byo mu birombe by’amabuye y’agaciro.

Ni mu gihe Minisitiri Ingabire Paula yihanganishije abarokotse Jenoside yakorewe abatutsi mu 1994 ndetse abifuriza gukomera, avuga ko Kwibuka ari inshingano kuri buri wese kandi ari n’igihango n’abazize Jenoside yakorewe abatutsi mu 1994.

Yabwiye abitabiriye iki gikorwa ko Jenoside yakorewe abatutsi yabaye indengakamere, ariko kwibuka bigomba kubaho kugira ngo abavukijwe ubuzima bazira uko baremwe basubizwe agaciro, hanazirikanwa inzira itoroshye abacitse ku icumu rya Jenoside yakorewe abatutsi mu 1994 banyuzemo ariko bakiyubaka bakongera kubaho.

Yakomeje avuga ko mu rwego rwo gukomeza kwiyubaka no gusigasira ibyagezweho, abantu bagomba gukomeza gusigasira ihame ry’ubumwe bw’abanyarwanda, bakomeza kwiyubaka no kwihesha agaciro, bashyira imbere ubunyarwanda, barandura amacakubumiri n’ingengabitekerezo ya Jenosode, baharanira amahame y’imiyoborere myiza na demokarasi, baharanira umuco wo gukora umurimo unoze, baba hafi abarokotse Jenoside yakorewe abatutsi, ndetse banarwanya ibyaha bya ruswa n’akarengane

Minisitiri Ingabire Paula yaboneyeho kwihanganisha imiryango y’abafite ababo bashyinguwe mu cyubahiro uyu munsi, asaba buri wese gukomeza gutanga amakuru y’ahaba hakiri imibiri y’abishwe muri Jenoside yakorewe abatutsi mu 1994, kugirango iboneke hanyuma ishyingurwe mu cyubahiro kuko ni bimwe mu bitera gukira no kubaka igihugu cyacu.

Ni mu gihe abitabiriye iki gikorwa bifatanyije mu kunamira inzirakarengane z’Abatutsi 23,240 baruhukiye muri uru rwibutso rwa Jenoside yakorewe Abatutsi mu 1994 rwa Musha, hanashyingurwa mu cyubahiro indi mibiri 21 yabonetse hirya no hino mu mirenge ya Fumbwe, Gahengeri na Musha; bivuze ko ubu imibiri yose iruhukiye muri uru rwibutso rwa Jenoside yakorewe Abatutsi rwa Musha ari 23,261.

Yanditswe na Dushimimana Elias

Related Articles

Leave a Reply

Your email address will not be published.

Back to top button