AmakuruKWIBUKA

Kwibuka28: Igihugu cyari gisibanganye ku ikarita y’isi, uyu munsi kiramurikira amahanga – Pamela Mudakikwa

Ingabo zari iza RPA, ishami rya Gisirikare rya FPR-Inkotanyi, zabohoye u Rwanda zinahagarika Jenoside yakorewe Abatutsi mu 1994 yahitanye abasaga Miliyoni mu minsi 100, zitanga ibyishimo n'intsinzi ikomeye ku Rwanda mu gihe amahanga n'ibihugu by'ibikomerezwa ku Isi byari byarutereranye. Iyi ntsinzi, abanyarwanda barasabwa kutayipfusha ubusa.

Muri iki gihe cyo kwibuka ku nshuro ya 28 Jenoside yakorewe Abatutsi muri Mata 1994, Pamela Mudakikwa, yasabye abanyarwanda gukura isomo ku mateka mabi yaranze u Rwanda bakayubakiraho “Igihugu twifuza”. Yabibukije ko u Rwanda rwari rugiye gusibangana ku ikarita y’isi mu gihe cya Jenoside yakorewe Abatutsi, none ubu ruramurikira amahanga.

Pamela Mudakikwa, Inzobere mu bijyanye n’itunamaho, unaherutse guhabwa igihembo muri Rwanda Influencer Awards nk’umuntu uvuga rikijyana ku rubuga rwa Twitter, yabwiye InyaRwanda.com ko “Jenoside yakorewe Abatutsi ni ikimenyetso simusiga cy’ubukana bw’ingengabitekerezo mbi y’urwango n’amacakubiri”.

Yasabye abanyarwanda bose kugira uruhare mu kubaka u Rwanda nk’igihugu bifuza, igicumbi cy’ubumwe, igihugu buri umwe azishimira kuraga abazamukomokaho nkuko Inyarwanda ibitangaza dukesha iyi nkuru.

Aragira ati “Ayo mateka yacu mabi tuyakuremo isomo twubakiraho igihugu twifuza, igicumbi cy’ubumwe, urukundo no kugira icyerekezo kimwe. Nguwo umurage mwiza tuzaraga abadukomokaho”.

Pamela avuga ko haburaga gato u Rwanda rugasibangana ku ikarita y’Isi, ariko ubu ni igihugu kimurikira amahanga. Ati “Jenoside yakorewe Abatutsi yashegeshe imitima, imibiri ndetse isenya igihugu. Turashimira Imana yatuzuye ikongera kuduha ubuzima, igihugu cyari gisibanganye ku ikarita y’isi uyu munsi kikaba kumurikira amahanga!”.

Yasabye abanyarwanda kudapfusha ubusa intsinzi yo kuzuka k’u Rwanda aho igihugu cyongeye kubona ubuzima nyuma ya Jenoside yakorewe Abatutsi, anabasaba gukumira icyo ari cyo cyose cyasubiza u Rwanda mu icuraburindi, ati “Iyo ntsinzi ntituyipfushe ubusa! Bibe inshingano yanjye nawe gukumira icyashaka kutubibamo amacakubiri yadusubiza mu icuraburindi”.

Yasoje atanga inama zafasha mu kurwanya abapfobya Jenoside yakorewe Abatutsi muri Mata 1994, ati “Abagoreka amateka, abahakana n’abapfobya Jenoside bahembera ingengabitekerezo yayo, tubatsindishe ukuri, dukomeze kwiyubakira igihugu tuzishimira kuraga abana bacu.

Yanditswe na Dushimimana Elias

Related Articles

Leave a Reply

Your email address will not be published.

Back to top button