AmakuruIMYIDAGADUROKWIBUKAPOLITIKI

Inkotanyi ni Ubuzima: Umuhanzi Bonhomme yongeye gukora Igitaramo gishima Ubutwari bw’Inkotanyi zabohoye u Rwanda mu 1994

Kuri uyu wa Gatandatu Bonhomme uririmba indirimbo zo gukunda igihugu, yakoze igitaramo ngarukamwaka yise "Inkotanyi ni ubuzima" kitabiriwe n’abatari bake, ni igitaramo cyo gushimira inkotanyi ku bwo kubohora u Rwanda mu 1994, no kugarura amahoro mu gihugu.

Mu gihe u Rwanda rwitegura kwizihiza umunsi wo Kwibohora uba ku itariki ya 4 Nyakanga, umuhanzi Bonhomme yongeye gukora igitaramo yise Inkotanyi ni ubuzima cyo gushimira Inkotanyi ku bwo kurwanirira amahoro y’igihugu.

Ni igitaramo uyu muhanzi yahuriyemo n’abandi barimo Eric Senderi, Munyanshoza uririmba indirimbo zo kwibuka na Nyirinkindi. Iki gitaramo cyatewe inkunga n’ikigo gitwara abagenzi Horizon Express, umuryango wa AERG Rwanda, umuryango wa Ibuka na AVEGA. Umushyitsi mukuru yari Perezida wa Ibuka.

Ku isaha ya saa kumi n’imwe n’igice z’umugoroba ni bwo Music band yageze ku rubyiniro, isusurutsa abari bamaze kuhagera mu ndirimbo zitandukanye zo gukunda igihugu, hakurikiyeho kwakira abari bitabiriye iki gitaramo byakozwe n’umuhuza w’amagambo Ntazinda Marcel, yongera no gusobanura impamvu y’ijambo “Inkotanyi ni ubuzima”.

Yahise yakira umuhanzi Munyanshoza wahagurukije benshi mu byicaro byabo batangira kuririmbana nawe, yaririmbye indirimbo Simba ya tembea msituni ishimisha benshi anatanga ubutumwa ku banyarwanda ko Inkotanyi ziri mu zabukuru zamutumye ngo “Nubwo tutacyambaye wa mwambaro turacyari inkotanyi cyane”. Yasoresheje ku ndirimbo iyo “Mana dusenga irakomeye”.

Yakurikiwe n’umuhanzi Nyirinkindi waririmbye Nzagaruka, Mwarakoze Inkotanyi, n’izindi, akurikirwa na Senderi wagaragarijwe ibyishimo byinshi akigera ku rubyiniro. Senderi yatangiriye ku ndirimbo ”Twaribohoye” akomereza kuri Icyo Kagame yatugejejeho, Twambariye gutsinda, n’izindi. Uyu muhanzi, ku rubyiniro yaje kugorwa n’ibyuma byakomeje gucika ariko abantu bakomeza kuririmba berekana ko bishimye.

Bonhomme wateguye iki gitaramo yaje nyuma ya Senderi, mu kugera ku rubyiniro yeretswe cyane ko ashyigikiwe n’abari bitabiriye, aririmba indirimbo Ikiguzi cy’amaraso, Amateka y’urugamba n’Urugamba. Yakomeje gushimira cyane Inkotanyi zasubije ubuzima abanyarwanda mu gihe bwari bugiye kuzima.

Uyu muhanzi kandi yamuritse CD y’indirimbo 10 yakoze, akangurira abanyarwanda kuzigura, hatanzwe amahirwe ku bifuzaga kuzigura ako kanya ku giciro bashaka, zigurwa n’abantu batandukanye barimo mushiki we, Super Manager wayiguze ibihumbi 200 by’amanyarwanda ari nayo menshi yatanzwe. Yabasabye gukomeza gushyigikira Inkotanyi.

Perezida wa Ibuka yahawe ijambo ryo gusoza agaruka ku mateka yaranze igihugu cy’u Rwanda, yunga mu byo abandi bavuze ashimira Inkotanyi, asaba abanyarwanda kudatatira igihango igihugu gifitanye nazo, kuzishyigikira no kugendera mu nzira Inkotanyi na Perezida wa Repubulika y’u Rwanda “bahora batwereka”.

Nyuma y’ijambo rya Perezida wa Ibuka, mu minota ya nyuma Bonhomme yagarutse ku rubyiniro akomeza kuririmba indirimbo zitandukanye ariko abantu babyina banaririmbana nawe, mu buryo ubona ko bishimye cyane. Uyu muhanzi yasoje n’isengesho asabira umugisha Inkotanyi zikiriho n’izaguye ku rugamba rwo kubohora igihugu.

InyaRwanda

Related Articles

Leave a Reply

Your email address will not be published.

Back to top button