POLITIKI

Dr Ugirashebuja Emmanuel yagizwe minisitiri w’ubutabera

Ashingiye kubiteganywa n’Itegeko Nshinga rya Repubulika y’u Rwanda ryo mu 2002 ryavuguruwe mu 2015 cyane cyane mu ngingo yaryo ya 116, Nyakubahwa Perezida wa Repubulika Paul Kagame yagize Dr Ugirashebuja Emmanuel Minisitiri w’ubutabera akaba n’intumwa nkuru ya leta.

Uyu mugabo wari umaze igihe ayobora Urukiko rwa East Africa dore ko hari hashize igihe kitageze ku mwaka asoje manda ye, yanigeze gutangwa nk’umukandida n’ibihugu bine kugirango abe umunyamuryango wa ICJ dore ko yari yatanzwe na Maroc, u Rwanda, Perou na Bolivia.

Busingye yakuwe muri Minisiteri y’Ubutabera agirwa Ambasaderi w’u Rwanda mu Bwongereza; ni mu mpinduka zakozwe ku wa 31 Kanama 2021.

Itangazo ryaturutse mu biro bya Minisitiri w’Intebe ryemeza Dr Ugirashebuja nka Minisitiri w’ubutabera

Dr Ugirashebuja yagizwe Minisitiri w’Ubutabera nyuma y’amezi arindwi avuye ku mwanya wa Perezida w’Urukiko rw’Umuryango wa Afurika y’Uburasirazuba (EACJ). Yasimbuwe na Kayobera Nestor ku wa 21 Gashyantare 2021.

EACJ ni urukiko rwashinzwe ku wa 30 Ugushingo 2001, abacamanza barushyirwamo baba bafite manda y’imyaka irindwi itongerwa.

Dr Ugirashebuja Emmanuel yavukiye i Nairobi ku wa 25 Ukuboza 1976. Afite Impamyabumenyi y’Ikirenga (PhD) mu Mategeko yakuye muri Kaminuza ya Edinburgh.

Yabaye Umuyobozi w’Ishuri ry’Amategeko muri Kaminuza y’u Rwanda (2009-2014) ndetse yanabaye Umujyanama mu by’Amategeko wa Komisiyo ishinzwe Itegeko Nshinga hagati ya 2001-2003.

Related Articles

Leave a Reply

Your email address will not be published.

Back to top button