AmakuruMU MAHANGAPOLITIKI

Cricket, Tennis n’ubuhinzi biri mu byaganiriwe na Perezida Kagame na Minisitiri w’Intebe wa Barbados

Cricket, Tennis n’ubuhinzi biri mu byaganiriwe na Perezida Kagame na Minisitiri w’Intebe wa Barbados, Ku mugoroba wo kuri uyu wa Gatandatu tariki 17 Mata 2022 nibwo nyakubahwa perezida wa Repubulika y’u Rwanda Paul Kagame yagiranye ibiganiro na Minisitiri w’Intebe w’iki gihugu cya Barbados, Mia Amor Mottley.

Perezidansi y’u Rwanda ibinyujije kuri Twitter, yavuze ko aba bayobozi banakurikiranye isinywa ry’amasezerano agamije gufasha mu kunoza ubutwererane hagati y’ibihugu byombi.

Ni nyuma y’aho Perezida Kagame yahuye akanaganira na Perezida wa Barbados, Sandra Mason.

Uretse ibiganiro byahuje Perezida Kagame na Minisitiri w’Intebe w’iki gihugu, aba bombi banahuye n’itangazamakuru.

Perezida Kagame yashimye urugwiro we n’itsinda bari kumwe bakiranywe yongeraho ko nubwo hagati y’ibihugu harimo intera ndende bifite ingorane bihanganye na zo n’inararibonye bishobora gusangira mu kubikemura.

Yavuze ko impande zombi zigiye kureba uburyo ibihugu byombi byakwagura imikoranire hagati yabyo kuri ubu u Rwanda rukaba rwiteguye kwakira Minisitiri w’Intebe ubwo azaba yitabiriye inama ya CHOGM izabera i Kigali muri Kamena uyu mwaka.

Nk’umwe mu bari bayoboye Komisiyo Mpuzamahanga y’Umuyoboro Mugari ishinzwe iterambere rirambye (United Nations Broadband Commission for Sustainable Dvelopment), Perezida Kagame yavuze ko yishimiye kwakira Minisitiri w’Intebe nka komiseri mushya umwaka ushize.

Yakomeje agira ati “Twishimiye kuba turi hano kandi turifuza kuzakomeza ubutwererane mu myaka iri imbere.”

Minisitiri w’Intebe, Mia Amor Mottley, yashimye imiyoborere ya Perezida Kagame avuga ko urugero rw’uko mu myaka 20 ishize u Rwanda rwivanye mu ngorane zikomeye rwabateye akanyabugabo muri iki kinyejana cya 21 ku mahirwe y’iterambere ashobora kugerwaho mu gihe igihugu cyaba gifite igenamigambi rihamye rya porogaramu z’iterambere kandi kikazishyira mu bikorwa.

Ati “Ubuyobozi bwawe bwafashije u Rwanda kuba inyenyeri imurika ku isi mu kugaragaza ibishoboka mu rwego rw’iterambere. Ntabwo ari ku bw’impanuka kuba warayoboye komisiyo ya Loni y’umuyoboro Mugari kuko wagaragaje uruhare rwa siyansi n’ikoranabuhanga mu iterambere.”

Minisitiri w’Intebe, Mottley, yavuze ko ibihugu byombi bishobora kugirana imikoranire mu bya ‘Biotechnology’, siyansi n’ikoranabuhanga kuko igihugu cye gifite abantu benshi bize ibya siyansi muri za kaminuza. Nko mu myaka itanu ishize za kaminuza zashyize ku isoko ry’umurimo abagera ku 6000.

Ibihugu byombi byiteguye kugirana amasezerano y’ubufatanye mu by’ishoramari ndetse Umugabane wa Afurika n’Ibihugu bya Caraïbes bigomba gukorana bya hafi.

Ati “Ingendo nk’izi zizafasha mu kwagura imikoranire yacu atari ku neza y’abaminisitiri cyangwa abakuru b’ibihugu ahubwo ni ku y’abaturage bacu bakeneye kuva hamwe bajya ahandi gukora ishoramari n’ubucuruzi.”

Impande zombi kandi zishobora gufatanya mu rwego rw’imikino by’umwihariko Cricket na Tennis, urw’ubuhinzi by’umwihariko ubw’imboga, imbuto n’indabo dore ko u Rwanda rumaze kubaka izina mu ruhando mpuzamahanga ndetse ubuhinzi bukaba butanga umusanzu ugaragara mu mutungo mbumbe w’igihugu.

Source: www.igihe.com

Yanditswe na Dushimimana Elias

Related Articles

Leave a Reply

Your email address will not be published.

Back to top button