AmakuruUBUZIMA

Covid-19 yaragabanutse muri Nzeri : Dr Sabin uyobora RBC

Umuyobozi mukuru w’ikigo cy’igihugu gishinzwe ubuzima RBC, Dr Nsanzimana Sabin yatangaje ko icyorezo cya Covid-19 cyagabanutse ugereranije nuko cyari gihagaze mu mezi ashize hari Nyakanga ubwo hari uduce twashyirwaga muri guma mu rugo.

Hakoreshejwe ikarita isanzwe yifashishwa mu kurebera hamwe uko icyorezo gihagaze mu gihugu aho imibare igaragaza ko abanduraga covid-19 bagabanutse cyane ugereranije no mu kwezi kwa Kanama ndetse n’ibikorwa by’ikingira bikaba bikomeje mu gihugu.

Dr. Nsanzimana Sabin yasabye abaturarwanda gukomeza gukurikiza amabwiriza yo kwirinda Covid-19 ndetse bakanitabira ibikorwa byo kwikingiza dore ko bigikomeje mu gihugu hose kugirango hatazagira uwicwa niki cyorezo.

Muri Kanama 2021 u Rwanda rwari rufite abarwayi benshi ba Covid-19 ndetse uturere nka Nyagatare, Gicumbi, Ngoma na Kirehe ubwandu bwari hejuru ya 10%, mu gihe uturere nka Nyaruguru, Huye, Nyamasheke, Karongi, Ngororero, Gakenke, Burera na Rwamagana ubwandu bwari hagati ya 5-9%.

Iyo karita igaragaza ko uturere dukeya nka Rubavu, Nyabihu, Musanze, Rulindo, Muhanga, Nyanza, Ruhango na Bugesera twari dufite ubwandu buri munsi ya 3%.

Icyakora imbaraga nyinshi zashyizwe mu gutanga inkingo, byatumye ubwandu bugabanuka, kuko ishusho y’uturere tw’u Rwanda kuva tariki 13-17 Nzeri 2021 igaragaza ko uturere twa Nyagatare, Ngoma na Kirehe na Karongi ariho haboneka ubwandu bwinshi buri hagati ya 5-9%.

Abaturarwanda barasabwa gukomeza kwitabira ibikorwa byo kwikingiza.

N’ubwo nta bisobanuro byatanzwe byimbitswe ku bituma utwo turere tugira ubwandu, ikiboneka ni uko ari uturere duhana imbibi n’ibindi bihugu nka Tanzania na Uganda, na ho Karongi ikaba ikorana n’ibice bya Repubulika iharanira Demokarasi ya Congo kandi hakorwa ubucuruzi bwambukiranya imipaka bunyuze mu mazi ahatari uburinzi nk’ubwashyizwe ku mipaka ya Rubavu na Rusizi.

Hagendewe ku mibare, RBC igaragaza ko mu Karere ka Karongi mu bantu 2,165 bapimwe abasanzwe banduye ari 203, Kirehe hapimwe 1,293 handuyemo 89, na ho Gicumbi hapimwe 2,262 handura 138 mu gihe Ngoma mu bantu 1,400 bapimwe abanduye ari 85 na ho Nyagatare mu bantu 1,470 bapimwe abanduye ni 92.

Iyo mibare igaragaza ko mu turere nka Ruhango mu bantu 900 bapimwe handuye umuntu umwe, na ho mu mujyi wa Kigali mu bantu 5,242 bapimwe abanduye ni 20, mu gihe i Rubavu hapimwe 1,200 hakaboneka abanduye 11.

Ibikorwa byo gukingira Covid-19 bitanga ikizere mu guhashya Covid-19 kuko hagendewe ku ijanisha ku bafashe inkingo zose, umujyi wa Kigali umaze gukingira kugera kuri 75%, Bugesera 18%, Rubavu 18%, Nyabihu 6%, Musanze 18%, Burera 7%, Muhanga 25%, Rusizi 17%.

Icyakora hari uturere tugifite ibipimo biri hasi nka Nyaruguru na Gisagara bafite 6%, Ngororero 5%, Nyamasheke, Nyamagabe, Kirehe na Ngoma na Ruhango bari ku 9%.

Ibipimo bya Covid-19 bigaragaza ko mu Rwanda hamaze kwandura abantu 97,190 hakaba hamaze gupfa abantu 1,259, abamaze gukira Covid-19 ni 45,469 na ho abakirwaye ni 50, 462.

Ubwandu bwa Covid-19 ku isi ubu bugeze kuri 233,569,801 na ho abamaze guhitanwa na yo ni 4,779,109, mu gihe abamaze gukira ari 210,390,914.

Related Articles

Leave a Reply

Your email address will not be published.

Back to top button