POLITIKI

Cabo Delgado: Imvano y’umutekano muke, Uburyo RDF irimo kugarura ubuzima muri Mozambique

Mbere ya Jenoside yakorewe Abatutsi mu Rwanda mu 1994, ubuyobozi bwariho bwaranzwe no gutoteza bamwe mu bana b’u Rwanda yewe bamwe baranameneshwa bagirwa impunzi, mu karengane kenshi karimo kubuzwa kwiga (Iringaniza) no kubuzwa gutaha mu gihugu cyabo nibyo byatumye Inkotanyi zifata umwanzuro wo gutangiza urugamba rwo kubohora Igihugu zigaca ako karengane ndetse ni amwe mu mahame remezo y’Umuryango wa FPR-Inkotanyi.

Kuba Abatutsi barishwe mu 1994 bakabura gitabara amahanga yose arebera kugera ubwo abana b’u Rwanda aribo bahagaritse ayo mahano byabaye umuco n’inshingano kuri buri munyarwanda kugira umutima utabara n’ingoga niyo mpamvu y’ibanze Ingabo z’u Rwanda zatabaye Mozambike vuba na bwangu.

Si ku nshuro ya mbere u Rwanda rutabaye n’ingoga benshi muribuka Darfour 2004, Sudani y’epfo, Haiti, Mali ndetse na Central African Republic muri ibyo bikorwa by’ubutabazi, Ingabo n’Abapolisi b’u Rwanda berekana ubudasa dore ko nyuma y’amage bagiye bagaragara mu bikorwa byo kugoboka abaturage nko kubagezaho amazi meza, kububakira amashuri ndetse n’amacumbi kubaba badafite aho kuba harimo nabubakirwa inzu zigezweho (Model Villages), ndetse harimo no kuvura abadafite amikoro ahagije.

Ni urugendo rureshya na Km 1540 aho Ingabo z’u Rwanda zagiye guhashya abaterabwoba bari bamaze imyaka isaga 5 bica abantu ndetse abenshi bakaba bari baravuye mu byabo kubera gukiza amagara yabo.

Mu gihe kitageze ku kwezi abasore n’inkumi bakomoka mu Rwagasabo babashije kwigarurira twinshi mu duce twari mu maboko y’ibyihebe harimo n’ibice bibumbatiye ubukungu bwa Mozambike, Ingabo na Polisi z’u Rwanda zoherejweyo zigera ku 1000 ariko bwa buhanga bwo gukotana nibwo bwiganje mu bikorwa biratwa na benshi bakoze mu gihe kitarenze iminsi 30 ku buryo ubuzima busa nk’uburi kugaruka mu baturage bo mu ntara ya Cabo Delgado.

Imbarutso y’umutekano muke i Cabo Delgado

Mu ntangiriro hari mu mwaka w’1998, hashyizweho agatsiko kagendera ku matwara akaze ya kisilamu, “Al Sunnah wa Jama’ah” (“umuryango w’abaSuna ” cyangwa “Ansar al-Sunnah”). Intego yawo yako ya mbere kavugaga ko kagendera ku matwara n’amategeko ya Shariya kandi abakagize badashyigikiye ubutegetsi bwa leta y’I Maputo batanashyigikiye ibikorwa by’Uburezi nk’amashuri,Ubuvuzi ndetse n’ibindi ntibashakaga ko bikomeza.
Abanyamuryango ba mbere ba Al Sunnah bari bafite ibirindiro mu majyepfo ya Tanzaniya mu mu mwaka w’2015, bayobowe n’umuyisilamu ukomoka mu gihugu cya Kenya witwa Aboud Rogo Mohammed, akaba yarashyizwe ku rutonde rwabafatiwe ibihano rwakozwe na Amerika ndetse na Loni kubera guhungabanya umutekano n’ibyaha birimo kwica,gusahura n’ibindi bikorwa byari mu mirongo y’imitwe y’iterabwoba Al Shababu n’indi myinshi byiganjemo ubwiyahuzi.

Abarwanyi ba IS muri Mozambique

Udutsiko tw’ibyo byihebe twagiye tugaragara mu duce turimo Balama ahagana mu 2007, maze umwe mu bari abayobozi bako Sualehe Rafael ukomoka mu bwoko bwitwa Makua yasubiye iwabo muri Mozambique ajya mu gace yavukiyemo mu mudugudu witwa Nhacole uyu mudugudu kandi banawita Muape yatashye amaze imyaka myinshi mu majyepfo ya Tanzania.

Umwaka wa 2016 wenda kugera ku musozo nibwo ako gatsiko kagiye kigarurira tumwe mu turere two mu ntara ya Cabo Delgado twavuga nka Palma,Nangade,Mocímboa da Praia na Montepuez.

Ibi byihebe rero byatangiye intambara ya kinyeshyamba cyane cyane mu ntangiriro ya 2017, nyuma zitangira kugenda zikoresha udutero shuma ari nako umubare wabo ugenda wiyongera dore ko bivugwa ko batangiye ari 300 bakaza kugera ku 1500 mu mpera za 2019, umwaka ushize wa 2020 bari bageze ku 2000 by’abarwanyi aho banagiye bakora ibikorwa byiganjemo ubwicanyi no kwangiza ibikorwa remezo muri Cabo Delgado.
Iyi ntara rero ya Cabo Delgado kuri ubu ni imwe mu zifatiye runini igihugu cya Mozambike dore ko mu myaka 10 ishize havumbuwe ibirombe bya Peteroli ndetse na gaze ku bwinshi ku buryo ako kahise gafatwa nk’ikigega cy’akataraboneka cya Peteroli na Gaze muri Afurika y’uburasirazuba ndetse n’iya majyepfo biri mu byakuruye amasosiyete y’ibikomerezwa nka Total y’abafaransa.

Inyubako nyinshi zarasenywe muri Cabo delgado.

Gusa ibi byihebe byari byarigaruriye uduce twinshi muri Cabo Delgado bitandukanye n’ibindi mu mikorere dore ko usibye itanagazo rimwe byasohoye muri Kamena 2019 igihe byemezaga ko ari ishami rya Leta ya Kislamu muri Mozambike ntabindi bikorwa bagiye batangaza nkuko indi mitwe nka Boko Haram ibikora.
Aka gatsiko ka Ansar al-Sunnah kahamije ko ari ishami rya Islamic State mu ntara yo muri Afurika yo hagati izwi mu mpine nka ISCAP, ndetse ikaba iri kumwe n’inyeshyamba za ADF zifite ibirindiro muri Kongo Kinshasa nayo idasiba kwivugana ubuzima buri munsi mu duce nka Beni n’ahandi.

Ubwo ibi byihebe byagabaga igitero cya mbere mu gace ka Macimboa da Praia uyu mujyi wari utuwe n’abasaga 20,000 cyangwa se 30,000, abajihadiste bagera 40 baje gusahura amenshi mu maduka ndetse banasenya inzu za leta ndetse n’amabanki ubundi bigerageza kwiyegereza abaturage ubundi birongera birazimira aho hari mu 2020 mu kwezi kwa gatatu.

Brig.Gen Muhizi Pascal ayoboye ingabo ziri ku rugamba.

Muri Kanama rero umwaka ushize nibwo ibyo byihebe byabashije kwigarurira agace ka Macimboa da Praia nyuma yo gutsintsura ingabo za Mozambike zari zanagerageje kwitabaza abacanshuro bari muri sosiyeti ya Lionel Dyck wahoze mu gisirikari cya Rhodesia y’epfo yahindutse Zimbabwe kuri ubu dore ko yigeze kwifashishwa nicyo gihugu na none mu myaka ya za 1980 mu kurwanya RENAMO, gusa taliki 12 Kanama umujyi waguye mu maboko y’ibyo byihebe kugeza ejo bundi ubwo Ingabo z’u Rwanda zabashaga kuwubohora.

Ingabo z’u Rwanda zinjiye gute muri urwo rugamba?

Mu gitondo cya taliki 6 Kanama 2019, umugaba w’ikirenga akaba n’Intore izirusha Intambwe Nyakubahwa Perezida wa Repubulika Paul Kagame yerekeje muri Mozambike hari mu muhango wo gushyira umukono ku masezerano y’impande zitavugaga rumwe icyo gihe ni ukuvuga inyeshyamba zari zishamikiye ku ishyaka rya RENAMO ritavugaga rumwe na Leta.
Ni amasezerano yashyiriweho umukono ku cyicaro gikuru cya RENAMO kiri ahitwa Gorongosa ari naho wavuga ko hari Etat Major ya RENAMO.

Muri Mata Perezida Nyusi yaje mu Rwanda

Nyakubahwa Paul Kagame yari yagiye muri Mozambike nyuma yuko Perexida Nyusi nawe yari yarasuye u Rwanda muri Nyakanga 2018, ni muri icyo gihe rero habaye isinywa ry’amasezerano atandukanye arimo nayo gutabarana, ku bijyanye n’uburezi, Viza,ubucuruzi ndetse nandi.
Muri Mata uyu mwaka rero nibwo Perezida wa Mozambike Filipe Nyusi yongeye kugirira uruzinduko mu Rwanda mu byatangajwe n’ibiro by’umukuru w’igihugu harimo ko baganiriye no kubijyanye no guhashya imitwe y’iterabwoba ndetse n’ibibangamira umutekano ku mpande zombi cyane cyane ibyari byibasiye Mozambike icyo gihe.

RDF ku ruhembe i Cabo Delgado!
Uko tumaze iminsi twumva intambara Ingabo z’u Rwanda zagiyemo muri Mozambique, ibiri kuba bitandukanye n’ibyo twabwiwe. Ni intambara nya ntambara ntabwo ari bimwe by’udusasu tubiri cyangwa dutatu dukubitira ku musozi iriya utundi ukatwumvira iyo mu mibande.
Ubusanzwe, Intara ya Cabo Delgado ni agace rwose katari kabereye kumvamo imirwano [nubwo ntaho ibereye] ariko urebye ubwiza nyaburanga bwaho ntiwakwifuza kubona ibiri kuhabera.

RDF na FDM zirafatanya mu guhashya ibyihebe

Agace gakora ku nyanja y’Abahinde umuntu yariraho ubuzima akumva uko abaye, henshi nta muntu uhatuye. Na bake bahari, batunzwe n’imyumbati gusa, barara muri nyakatsi ubundi bakisegura akarago hasi ku mucanga.
Ku wa Gatandatu ushize mu Ntara ya Cabo Delgado neza mu gace ka Afungi. Ubwo Ingabo z’u Rwanda zahageraga mu ntangiriro za Nyakanga, zagabwemo amashami, zimwe zitangira urugamba zinyuze Afungi-Palma.

Kimwe mu bikorwa zahereyeho ni ugufata Ikibuga cy’Indege cya Afungi, ubu kigenzurwa amanywa n’ijoro na Polisi y’u Rwanda hanyuma zikomeza imbere mu tundi duce nka Mute, Mapalanganha, Namalala, Tete, Quelimane, Njama zigarurira na Mocimboa da Praia ahafatwaga nk’ikicaro gikuru cy’abo baterabwoba.
Muri uru rugamba birasa n’aho Ingabo z’u Rwanda zifite inshingano zo kurwana zikigarurira ibice runaka, hanyuma aho zimaze gufata, Polisi y’u Rwanda na yo ikaza ikahasigasira ku buryo nta muntu uzongera kuhigabiza. Ni ya gahunda yo gusigasira ibyo twagezeho ikomeje!

Gen Major. Innocent Kabandana niwe muhuzabikorwa w’ibikorwa bihuriweho byo kurwanya iterabwoba                muri Mozambique.

Nubwo ariko bimeze bityo, si inzira yoroshye. Mu nzira abo barwanyi bagenda bategamo udutero shuma nka kamwe kabaye kuri wa musirikare w’u Rwanda wakomeretse mu kwezi gushize.
Bivugwa ko muri urwo rugendo, ushobora guhuriramo na za “ambush” zitari munsi y’eshatu. Kimwe mu byo iyi mitwe, ikoresha ni uko abarwanyi bayo na bo bagikunze ubuzima, ntabwo ari nka bimwe bya “Islamic State” cyangwa “Al Shabaab” usanga abarwanyi biturikirizaho ibisasu.
amakuru avuga ko ibyo byihebe byo ntabwo byiturikirizaho ibisasu ariko ushobora kumurasa utamuhamya neza agakomeza aza agusanga.

Ubwato bukoreshwa mu gucunga umutekano ku cyambu cya Afungi bwavuye mu Rwanda
Kubona u Rwanda rufata ubwato bwa gisirikare, bukava i Kigali n’ahandi bwari buri, bukurizwa mu ndege bukagera muri Mozambique ni ikikwereka uburyo iyi ntambara rwayiteguye mu mfuruka zose kandi kuva Kigali ujya Maputo biroroshye kuruta kuva Maputo werekeza mu ntara ya Cabo Delgado.
Hari umuntu wakwibaza ikintu izi nyeshyamba zari zikurikiye muri Afungi, uwo ni nk’uwakwibaza impamvu Total y’Abafaransa yahashyize ibikorwa! Byose byatangiye mu myaka ya 2010, ni bwo bwa mbere muri aka gace havumbuwemo gaz.

Nyuma y’imyaka irindwi, ya gaz yari igamije guteza imbere agace, inyeshyamba zashatse kuyigarurira. Icyo gihe Total na yo yari mu biganiro na leta kugira ngo ihakore uruganda ruyitunganya.

Urwo ruganda rwarubatswe mu mushinga wa miliyari 20$. Uhageze ubona ibikorwa rwose byo ku rwego ruhambaye byari bimaze gukorwa. Urugero ni nk’ikigo abakozi ba Total bari kuzajya babamo, ukigereranyije na hotel, ni imwe y’inyenyeri nibura enye kuko gifite buri kimwe cyose.

N’umushinga w’Ikibuga cy’Indege cya Afungi na wo wari muri iyo gahunda witwaga “LNG”. Aho Afungi rero ni hamwe mu hagombaga gukurwa gaz, uhageze uyu munsi uhasanga imodoka n’ibindi bikoresho.
Mu nzira ugenda na ho uhabona imodoka nyinshi, mu ntangiriro z’uyu mwaka, Abafaransa barazitaye baritahira, bakiza amagara yabo nyuma y’uko inyeshyamba zari zitangiye kwirara mu baturage, zikabica zibakase imitwe ndetse zigatwika ibyabo. Total yatangaje ko impamvu zo guhagarika ibikorwa ari “Force Majeure’.
RDF na RNP zigenzura icyo cyambu amanywa n’ijoro ku buryo izo nyeshyamba zidashobora kwifashisha amazi ngo zambuke zigana ku butaka. Hari n’igitero giherutse kubera ku karwa gato kari muri iyo nyanja, ariko abarwanyi bafashwe mpiri bashyikirizwa Leta ya Mozambique.

Ku rundi ruhande, ibice byamaze kugarurwamo amahoro bicungwa amanywa n’ijoro. Urugero ni Icyambu cya Afungi. Amanywa n’ijoro hakorwa ubugenzuzi bwo mu mazi harebwa ko nta mwanzi ushobora gutera ahanyuze.
Iki cyambu kiri hafi y’Intara ya Palma. Ni ahantu hari ubutunzi bukomeye kuko hacukurwa gaz.
Afungi Port, ni inzira yagombaga kuzajya yifashishwa muri ibyo bikorwa by’ubucukuzi bwa gaz.

Abaturage bakuwe mu byabo n’intambara bagowe no kubona aho bakinga umusaya
Quitunda, igisubizo ku wibaza impamvu RDF iri muri Mozambique
Uvuye kuri iki cyambu, ukerekeza ahitwa Quitunda, ni mu Majyaruguru ya Palma wasobanukirwa neza neza impamvu Ingabo z’u Rwanda zagiye muri Mozambique muri iyi ntambara.
Uhingukira ku nzu za nyakatsi, ariko zimwe za nyuma ku Isi ahari.

Zubakishije bya biti bita imishingiriro, bimwe bashingiriza ibishyimbo. Hejuru hariho utwatsi, mu mpande ni uduhema, imbere ni udutenge dushaje dukinzeho. Muri ako kantu gasa n’inzu, nta buriri bubamo, nta karago usibye utwatsi tumeze nk’ishinge [ukaba wakeka ko ari umusego] ubwo nawe urabyumva ahandi ni umucanga.
Quitunda ni agace ko muri Palma, Umujyi uri mu Majyaruguru ashyira Uburasirazuba bwa Mozambique. Iyo uwurimo uba uri hafi y’umupaka wa Tanzania kuko bisaba nibura ibilometero 32 ngo ugereyo.
Ni na yo mpamvu mu baturage bawo, usangamo umubare munini w’abavuga Igiswahili. Guhera mu ntangiriro z’uyu mwaka, uyu mujyi wabaye isibaniro ry’imirwano, abaturage bicwa umusubizo, bakaswe imitwe, abandi bakiza amagara yabo.

Abaturage batangiye gusubira mu byabo nyuma y’imyaka itanu.

Abaturage bahungiye mu Nkambi ya Quitunda ubuzima burabakomereye, gusa banyuzamo bakamwenyura bya bindi byo kubura uko ugira ukagwa neza.
Gusa bashima ko uyu munsi umutekano uhari muri ako gace kubera ingabo z’u Rwanda zibaba hafi amanywa n’ijoro bati ’ariko turashonje.’

Bakkhali Ali Mbaya, ni umwe muri bo, afite abagore batatu n’abana icumi yavuze ko yakuwe mu bye aho yari atuye mu gace ka Bella Vista mu Mujyi wa Palma.
Yagize ati “Naje hano mpunze ibyihebe kubera intambara, byaduteye tariki ya 24 Werurwe. Byari ahagana saa Kumi, byanyuze inzira y’ubusamo bigera kuri sitasiyo ya gisirikare aho byatangiye ubwicanyi. Mbere twari tubayeho neza ariko hatangira kwinjiramo ikintu cyo kudahuza imyemerere y’amadini.’’
Yavuze ko uko kutumvikana kw’abayoboke b’amadini n’ibyo bemera byatumye bamwe bayoboka inzira y’ishyamba bajya mu mutwe w’iterabwoba.

Yakomeje ati “Ubu turashima Imana kuko kuva igihe ingabo z’u Rwanda zagereye hano, ubu dufite amahoro, turaryama tugasinzira neza. Nizeye ko n’abafite ubwoba ubu bashize impumu kuko bizeye ko barinzwe n’ingabo z’igihugu n’iz’u Rwanda.’’
Mugenzi we yagize ati “Nishimiye byimazeyo kuba ingabo z’u Rwanda zaraje hano. Turaryama tugasinzira neza, ntabwo duhangayitse, imitima yacu yatangiye gutuza. Twatangiye gutuza nyuma y’aho Ingabo zihagereye. Turashimira cyane ubufatanye bw’ingabo z’u Rwanda n’iza Mozambique. Turashimira cyane.”
Ubu bibarwa ko abaturage barenga ibihumbi 20 bavuye mu byabo mu gace ka Palma hanyuma muri bo abarenga ibihumbi 10 bahungiye Quitunda.

Polisi y’u Rwanda bisa n’aho ifite inshingano zihariye muri uru rugamba zo gusigasira ibice biri mu maboko y’Ingabo z’u Rwanda ,Ikibuga cy’Indege cya Afungi, kiri mu maboko y’u Rwanda kuva muri Nyakanga. Muri iki gihe, Abapolisi b’u Rwanda baba bari maso umunota ku wundi.

Kuba Ingabo na Polisi by’u Rwanda biri mu bikorwa bya gitwari byo guhashya iterabwoba mu gihugu kitari no hafi y’ u Rwanda ni ikimenyetso cyuko gusigasira amahoro ari imwe mu ntego ziri kandi zizahoraho ku Rwanda ndetse rukanabiharanira aho bishoboka rukaba rwanatangayo umusanzu.
Mu minsi ishize kandi ibi bikorwa byakomereje mu gace ka Mbau aho Ingabo z’u Rwanda RDF zifatanije niza Mozambique zabashije kwigarurira ako gace kari mu twa nyuma abaterabwoba bari bafite nubwo hakiri uduce tumwe na tumwe tukiri mu maboko y’ibyihebe.

Mu bikorwa zirimo byo kugarura amahoro kandi Ingabo z’u Rwanda zatangiye ibikorwa byo gusubiza abaturage mu byabo nyuma y’imyaka isaga itanu babivuyemo kubera umutekano muke ndetse no guha ubuvuzi bw’ibanze abafite indwara zoroheje.

Haranateganywa kandi gukomeza ibikorwa byo kurandura burundu abo barwanyi bakomeje kwihishahisha mu mashyamba ari ku mipaka ya Mozambique na Tanzania nkuko umuvugizi w’Ingabo z’u Rwanda Col Rwivanga aherutse kubitangariza Itangazamakuru.

Related Articles

Leave a Reply

Your email address will not be published.

Back to top button