AmakuruIMIKINO

C.Ronaldo ku mwanya wa 3, Messi kuwa 2 – Urutonde rw’abakinnyi binjiza agatubutse binyuze mu kwamamaza, menya uwa mbere

Abakurikirana ibikorwa by’imikino itandukanye irimo umupira w’amaguru, Iteramakofi, Basketball, Tennis, American Football na Formula One bakunda kubona bimwe mu byamamare muri iyi mikino byamamaza sosiyete zikora ibintu bitandukanye ku myambaro n’inkweto byambara cyangwa ku modoka bitwara.

Hifashishijwe urutonde ruheruka gukorwa n’urubuga The Forbes, imitari.rw yabakusanyirije abakinnyi binjiza amafaranga menshi ku mwaka avuye muri ibi bikorwa na sosiyete bamamariza.

10.Kevin Durant

Uyu mwirabura w’Umunyamerika akina umukino w’intoki wa Basketball, mu Ikipe ya Brooklyn Nets ndetse yinjiza miliyoni 75$ ku mwaka binyuze mu kwamamaza.
Afitanye amasezerano na sosiyete zitandukanye zirimo Nike ikora imyenda n’inkweto, Coinbase ikora ivunjisha ry’ifaranga ry’ikoranabuhanga, sosiyete y’indege ya Alaska, Sonic Drive-In ikora ibijyanye no gutwara ibiribwa ndetse na sosiyete ikora écouters zo mu matwi izwi nka “Beats”.

9.Tomy Brady

Uyu mukinnyi yinjiza miliyoni 76$ ku mwaka akuye mu kwamamaza. Aherutse gusezera kumugaragaro ku mukino w’intoki wa ‘American Football’ mu Ikipe ya Tampa Bay Bucaneers.

Tom Brady yamamarizaga sosiyete zirimo Under Armour ikora imyambaro n’inkweto by’abakinnyi, UGG ikora inkweto zisanzwe zo kwambara, Tag Heuer ikora amasaha na Aston Martin ikora imodoka.

8.Sir Lewis Hamilton

Uyu mugabo ukina umukino wo gusiganwa ku modoka nto uzwi nka Formula One, usanzwe akinira Mercedes Benz yinjiza miliyoni 82$ ku mwaka binyuze mu bikorwa byo kwamaza.

Zimwe muri sosiyete yamamaza zirimo Tommy Hilfiger ikora imyenda, inkweto n’indorerwamu z’amaso ‘lunettes’, Mercedes Benz ikora imodoka, Gran Turismo Sport ikora imikino ikinirwa kuri televiziyo, Bell Helmets ikora ‘casques’ zo kwambara ku mutwe na Sony ikora ibikoresho by’ikoranabuhanga birimo televiziyo na telefone ngendanwa.

7.Roger Federer

Uyu akina umukino w’intoki wa Tennis. Yinjiza miliyoni 90$ ku mwaka ayakuye mu bikorwa byo kwamamaza.
Zimwe muri sosiyete akorana na zo harimo Nike, Uniqlo ikora ibijyanye n’imyenda na Rolex ikora amasaha.

6.Neymar Junior Dos Santos

Umukinnyi rurangiranwa ukomoka muri Brazil asanzwe yatakira ikipe ya Paris Saint Germain yo mu Bufaransa. Yinjiza miliyoni 95$ ku mwaka ayakuye mu bikorwa byo kwamamaza.

Sosiyete yamamaza zirimo Puma ikora imyenda n’inkweto, Red Bull ikora ibinyobwa, RePlay Jeans ikora imyenda, sosiyete y’indege ya Qatar na DAZN yerekana imikino kuri ‘internet’ mu buryo bwa ‘Livestreaming’.

5.Lebron James

Akina umukino w’intoki wa Basketball mu Ikipe ya Los Angeles Lakers. Uyu mukinnyi yinjiza miliyoni 96$ ku mwaka akura mu bikorwa byo kwamamaza.

Zimwe muri sosiyete zifitanye amasezerano n’iki gihangange harimo Coca-Cola ikora ibinyobwa, Nike, Upper Deck ikora amakarita yifashishwa mu bucuruzi, McDonald’s ikora ibiribwa, Samsung na Microsoft bikora ibikoresho by’ikoranabuhanga.

4.Dak Prescott

Uyu akina umukino w’intoki wa American Football mu Ikipe ya Dallas Cowboys. Yinjiza miliyoni 107,5$ avana mu kwamamaza.

Zimwe muri sosiyete yamamariza zikomeye harimo Nike, mu masezerano ye harimo kwambara inkweto n’umwenda bya ‘Air Jordan’ zikorwa n’iyi sosiyete mu rwego rwo kuzamura izina “Jordan” muri Shampiyona y’ababigize umwuga ya “NFL” muri Amerika. Ni we mukinnyi uhembwa agatubutse muri iyo Shampiyona.

3.Cristiano Ronaldo

Uyu ni umunyabigwi mu mukino w’umupira w’amaguru. Akina mu Ikipe ya Manchester United mu Bwongereza ndetse yinjiza miliyoni 120$ avana mu kwamamaza.

Uyu Munya-Portugal yamamaza amwe mu masosiyete akomeye arimo HerbalLife ikora imiti mu bimera inifashishwa n’abakinnyi, Armani ikora ikanacuruza imyambaro, inkweto, amasaha n’imikufi byo kwambara, Unilever ikora ibikoresho by’isuku ikanatunganya ibyo kurya na KFC itunganya amafunguro.

2.Lionel Messi

Ni umukinnyi ukina umupira w’amaguru mu ikipe ya Paris Saint Germain mu Bufaransa. Yinjiza miliyoni 130$ zivuye mu kwamamaza.

Uyu Munya-Argentine yamamariza amasosiyete atandukanye arimo OrCam ifasha ababana n’ubumuga bwo kutabona, Adidas ikora inkweto n’imyenda, Pepsi ikora ibinyobwa n’Ishami ry’umuryango w’Abibumbye ryita ku buzima ‘WHO’.

1.Conor McGregory

Uyu mugabo ukomoka muri Ireland ukina imikino njyarugamba yinjiza miliyoni 180$ ku mwaka avuye mu bikorwa byo kwamamaza.
Amwe mu masosiyete yamamariza arimo Burger King ikora ‘hamburger’, DraftKings ikora ibijyanye n’imikino y’amahirwe na Reebok ikora inkweto n’imyambaro.

Ubutaha ku bufatanye bw’abanyamakuru ba imitari.rw tuzabagezaho uko iwacu muri Africa byifashe ndetse no mu Rwanda mu kwamamaza…Ese ninde winjiza menshi mu Rwanda abikesha impano ye yo gukina?

Dushimimana Elias

Related Articles

Leave a Reply

Your email address will not be published.

Back to top button