MU MAHANGAPOLITIKI

Burkina Faso: urubanza ku rupfu rwa Thomas Sankara rwatangiye

Urubanza ruregwamo abagize uruhare mu kwica  Kapiteni Thomas Sankara wahoze ari perezida wa Burkina Faso, wishwe  ku ya 15 Ukwakira 1987 hamwe n’abandi bantu cumi na babiri, rwatangiye kuri uyu  wa mbere, tariki ya 11 Ukwakira i Ouagadougou, nyuma yuko  hashize imyaka 34 yishwe.

Muri uru rubanza, abantu icumi barimo uwamusimbuye wanahoze ari  Perezida Blaise Compaoré , na Jenerali Gilbert Diendéré bakatiwe igifungo cy’imyaka 20 muri coup d’etat yageragejwe ariko ntiyagerwaho  mu 2015, bakurikiranyweho kugira uruhare mu iyicwa rya Sankara

Abaregwa bakurikiranwa by’umwihariko kubera “ibyaha byo guhungabanya umutekano wa Leta, ubwicanyi, inyandiko mpimbano, guhisha imirambo, n’ibindi … cyangwa ubufatanyacyaha muri ibyo byaha”.

Uwahoze ari Perezida wa Burkina Faso, Blaise Compaoré, ushinjwa muri uru rubanza, kubera “kubangamira  umutekano w’igihugu, ubufatanyacyaha mu bwicanyi no guhisha imirambo”, yabaga muri Cote d’Ivoire kuva yahirikwa ku butegetsi   mu kwezi kwa cumi 2014.

Ku ya 07 Ukwakira, mu itangazo rigenewe abanyamakuru, abunganizi ba Compaoré bamenyesheje ko umukiriya wabo “atazitaba ubutabera  ko ndetse nabo batazigera bagaragara mu rukiko aho bashimangiye ko uru rubanza ari urwa politiki.

Thomas Sankara yishwe bigizwemo uruhare n’uwari inshuti ye Blaise Compaore (Ibumoso).

Bashimangiye ko iki cyemezo kijyanye n’imyumvire ishimangira ko umukiriya wabo “atigeze ahamagazwa ngo abazwe cyangwa ngo amenyeshe igikorwa icyo ari cyo cyose uretse guhamagarwa kwa nyuma imbere y’umucamanza”.

Ubwunganizi bwa Compaoré buvuga kandi ko umukiriya wabo asanganywe  ubudahangarwa kuko  yahoze ari umukuru w’igihugu, hakurikijwe Itegeko Nshinga rya Burkina Faso.

Thomas Sankara,afatwa nk’intwari ndetse muri Burkina Faso ndetse rimwe na rimwe afatwa nk’intwari y’afurika, yicwa  icyo gihe yari afite imyaka 37, 1987 ari kumwe na bagenzi be cumi na babiri muri coup d’etat yashyize ku butegetsi uwari inshuti ye magara haba mu buzima busanzwe ndetse no mu gisirikari, Blaise Compaoré.

Related Articles

Leave a Reply

Your email address will not be published.

Back to top button