AmakuruPOLITIKI

Bagosora umwe mu bacurabwenge ba Jenoside azibukirwa kuki?

Abazi amateka y’igihugu cyacu kuva Habyarimana yajya ku butegetsi bazi icyitwaga akazu kari kiganjemo abo mu muryango wa Agatha Kanziga dore ko aribo bari ku butegetsi guhera mu nzego zo hasi kugera mu bushorishori bw’ubutegetsi bwa MRND muri abo harimo na Col Theoneste Bagosora ufatwa nk’umucurabwenge wa Jenoside yakorewe Abatutsi mu 1994.

Uyu mugabo kuva yiga mu iseminari yakunze kurangwaho kwanga Abatutsi ndetse akanashishikariza abandi banyeshuri biganaga kugirira nabi abanyeshuri b’abatutsi babaga bagize amahirwe yo kujya kwiga dore ko bitari byoroshye mu myaka ya za 1959.

Ku munsi wo kuwa gatandatu hari tariki 25 Nzeri nibwo uyu mucurabwenge wa Jenoside yapfuye aho yari mu bitaro byo mu gihugu cya Mali aho yari arwariye umutima nkuko byatangajwe n’umuhungu we Achille Bagosora abinyujije kuri Facebook.

Bagosora wari ufite imyaka 80 yari yarakatiwe igifungo cya burundu ariko akaza kujurira kikagirwa imyaka 35 yari aherutse gusaba ko yaafungurwa ariko biterwa utwatsi n’urwego rwasigariyeho TPIR; byavuzwe ko yasabaga gufungurwa kubera indwara y’umutima yari arwaye.

Uyu mugabo wavuye mu gisirikari mu 1992 ariko akabasha kugumana umwanya we nk’umuyobozi w’ibiro bya minisitiri w’Ingabo umwanya wamuhaga imbaraga mu bugenzuzi bw’ingabo ndetse n’ibikorwa byo kugirira nabi Abatutsi kuko yari umwe mu bakomeye mu kazu.

Uyu mugabo yagarutsweho cyane ubwo yavaga mu mishyikirano ya Arusha arakaye agahita atangaza ko agiye gutegura imperuka ku batutsi, ubwo yatangaga ubuhamya muri TPIR General Romeo Dallaire yamwise ubwonko bwa Jenoside “Cerveau du Genocide” ndetse anamushyira ku isonga mu bateguye bakanashyira mu bikorwa Jenoside yahitanye abarenga miliyoni mu gihe kitageze ku minsi ijana gusa.

Abenshi mu barwanya leta y’u Rwanda biganjemo abagize uruhare muri Jenoside yakorewe abatutsi biganje mu bufaransa bari mu bari gutegura uko umurambo we wakwerekezwa mu bufaransa ariko abenshi mu bashyira mu gaciro bakaba baratangiye kwamagana ibyicyo gikorwa.

Related Articles

Leave a Reply

Your email address will not be published.

Back to top button