AmakuruKWIBUKA

Ba nyampinga n’urubyiruko rurimo ibyamamare biyemeje kurinda no gusigasira ibyagezweho mu gikorwa cya-“Our Past Initiative”

Urubyiruko rutandukanye rurimo ibyamamare ndetse na ba Nyampinga bo mu myaka itandukanye, kuri uyu wa Gatandatu rwahuriye ku Rwibutso rwa Jenoside rwa Kigali, mu gikorwa cyo kwibuka Jenoside yakorewe Abatutsi mu 1994.

Umuryango ‘Our Past Initiative’ ugamije kwiga no kwigisha abakiri bato amateka ya Jenoside yakorewe Abatutsi mu 1994, binyuze ku bikorwa itegura yateguye igikorwa cyo kwibuka cyahuje urubyiruko rutandukanye, rugamije kumenya amateka.

Ni igikorwa cyari kibereye ijisho aho urubyiruko rwabashije gusobanurirwa uko Jenoside yakorewe Abatutsi mu 1994 yateguwe igashyirwa mu bikorwa, ku buryo Abatutsi basaga Miliyoni bishwe urw’agashinyaguro.

Mu mikino yagendaga ibyerekana ndetse n’ibiganiro bitandukanye, uru rubyiruko rwasobanukiwe ndetse rwiyemeza gusenyera umugozi umwe, wo kurinda ibyagezweho no gukomeza gusigasira amateka y’igihugu cyacu.

Mu kiganiro cyihariye yagiranye na INYARWANDA dukesha iyi nkuru, umuyobozi wa “Our Past”, Ntwari Christian yasobanuye “Our Past”, ndetse asobanura intego yayo ikubiye mu bice bitatu bari bafite bajya kuyishinga.

Yagize ati “Our Past” ni umuryango w’urubyiruko watangijwe n’urubyiruko, kugira ngo twige nk’urubyiruko twige amateka yacu no kuyasobanukirwa. Ikindi kwari ugukangurira urubyiruko twegera, ndetse no gufasha abagizweho ingaruka na Jenoside yakorewe Abatutsi mu 1994. Icya gatatu akaba ari ugusaba abakuze, ababyeyi n’abayobozi kuganiriza urubyiruko bakarubwiza ukuri ku mateka yaranze igihugu cyacu, ku buryo ibyo byagezweho tubasha kubisigasira”.

Aganira kandi na Imitari.rw mu kiganiro kihariye yavuze ko Our Past Initiative” imaze imyaka 11 ikora, ifite intego eshatu zirimo kwiga no kwigisha urubyiruko amateka, gukangurira abakuru kwigisha urubyiruko amateka yaranze Jenoside no gukangurira urubyiruko kwegera no gufasha abarokotse Jenoside yakorewe Abatutsi mu 1994.

Muri iyi myaka bakoze ibikorwa bitandukanye, birimo gufasha ababa mu mudugudu w’abamugariye ku rugamba wo mu Murenge wa Kanombe.

Mu 2015-2020 bavuguruye amazu atandatu y’abarokotse Jenoside, banubaka imwe mu Mudugudu wa Ntarama, banabagenera amazi n’amashanyarazi akomoka ku mirasire y’izuba. Banatanze ubwisungane mu kwivuza ku miryango 30.

Kuwa Gatandatu tariki 26 Werurwe 2021, mu Murenge wa Ngeruka mu Karere ka Bugesera mu Ntara y’Iburasirazuba hakozwe igikorwa cyo kuvugurura amazu y’Abanyarwanda birukanywe muri Tanzania mu 2012 ndetse banabafasha gutangiza imishinga mito n’ibindi byinshi, bemeza ko ibikorwa byabo bikomeje.

Yanditswe na Dushimimana Elias

Related Articles

Leave a Reply

Your email address will not be published.

Back to top button