IMIKINO

Amavubi yatsinzwe umukino wa mbere mu gushaka itike y’igikombe cy’isi

Mu ijonjora rya kabiri ryo gushaka itike yo kwerekeza mu gikombe cy’isi cyo mu 2022 cyizabera muri Qatar mu kwezi kw’Ugushyingo kuko mu mpeshyi muri Qatar haba hari ubushyuhe bukomeye cyane, ni muri urwo rwego rero hatangiye amajonjora ya kabiri yo gushaka itike yo kwerekeza muri icyo gikombe aho mu gihugu cya Morocco ikipe y’igihugu ya Mali yari yakiriye u Rwanda umukino wasojwe u Rwanda rutsinzwe 1-0.

Mu minsi ishize nibwo Impuzamashyirahamwe y’umupira w’amaguru muri Afurika (CAF) yatangaje ko nta Stade nimwe yo muri Mali yemewe ku buryo yakwakira imikino y’amajonjora yo kwerekeza mu gikombe cy’isi bityo umukino wagombaga guhuza Mali n’u Rwanda wimurirwa mu gihugu cya Marocco mu mujyi wa Aggadir.

Yannick Mukunzi nyuma yo gukora ikosa ryavuyemo Penaliti.

Mali yatangiye irusha u Rwanda ku buryo bugaragara ndetse iza no kubona penaliti nyuma y’ikosa ryari rikozwe na Yannick Mukunzi ariko umuzamu Emery Mvuyekure akuramo penaliti yari itewe na rutahizamu wa Southampton Moussa Djenepo gusa ntabwo byigeze bitinzamo kuko ku munota wa 20 gusa umusore Adam Traore afungura amazamu.

Umuzamu Emery Mvuyekure yakuyemo Penaliti muri uyu mukino.

Amavubi yatangiye yugarira yakomeje kugorwa no kugera mu kibuga cya Mali  ku buryo mu mukino wose nta shoti na rimwe rigana mu izamu Amavubi yateye mu gihe kandi umuzamu Emery Mvuyekure yakoze ibishoboka byose akuramo imipira yari ikomeye yagiye iterwa na ba rutahizamu ba Mali.

Amavubi agomba guhita agaruka vuba na bwangu kuko ku cyumweru azakira ikipe y’igihugu ya Kenya Harambe Stars kuri stade ya Kigali i Nyamirambo mu mukino wa kabiri wo mu itsinda E.

Related Articles

Leave a Reply

Your email address will not be published.

Back to top button