IMIKINO

Amavubi yananiwe gutsindira Kenya i Kigali

Mu mukino wa kabiri wo mu itsinda rya E mu gushaka itike yo kwerekeza mu gikombe cy’isi cyizabera muri Qatar umwaka utaha ikipe y’igihugu Amavubi yaguye miswi na Harambe Stars ya Kenya 1-1 mu mukino wabereye kuri stade ya Kigali i Nyamirambo.

Umutoza Mashami Vincent yari yakoze impinduka mu mikinishirize dore ko yari yahinduye uburyo yakinnye muri Maroc ubwo yatsindwaga na Mali mu mukino ufungura amajonjora ya kabiri yo gushaka itike igana mu gikombe cy’isi aho yakinishije abakina mu mutima wa ba myugariri bagera kuri 3.

Umukino watangiye amakipe yombi asatirana, ariko ikipe y’igihugu ya Kenya iza guhirwa n’intangiriro z’umukino, dore ko ku munota wa 10 gusa kapiteni w’ikipe y’igihugu ya Kenya Michael Olunga yaje gufungura amazamu nyuma yo kutumvikana kw’abakinnyi bugarira b’U Rwanda ndetse n’umuzamu Mvuyekure Emery biviramo Kenya gufungura amazamu hakiri kare.

Nyuma yo gutsindwa icyo gitego Amavubi ntago yakomeje guhirwa dore ko umukinnyi Byiringiro Lague usanzwe akinira APR Fc yaje kugira ikibazo nyuma yo gukorerwa ikosa ndetse ahita ashyirwa mu mbangukiragutabara kugirango yitabweho n’abaganga nyuma y’uko bigaragaye ko yababaye.

Ku munota wa 28 nibwo Amavubi yaje kubona igitego cyo kwishyura gitsinzwe na myugariro Abdoul Rwatubyaye byatumye byibuza ikizere kigaruka ku banyarwanda benshi bareberaga umukino mu rugo nyuma yuko FIFA na CAF bateye utwatsi icyifuzo cya FERWAFA cyo kuba abafana baza kureba umukino, bityo amakipe yombi ajya kuruhuka anganya 1-1.

Nta mpinduka nyinshi zabayeho mu gice cya kabiri cy’umukino kugeza ubwo umukino warangiraga bituma Amavubi aguma ku mwanya wa nyuma mu gihe kandi hari undi umukino wundi utegerejwe mu gihugu cya Uganda aho Uganda Cranes izaba yakiriye Les Aigles du Mali kuri St Mary’s Kitende Stadium ku munsi w’ejo taliki 6 Nzeri uyu mwaka.

Imikino y’umunsi wa gatatu izakomeza mu kwezi gutaha ubwo u Rwanda ruzakira ikipe y’igihugu ya Uganda mu gihe kandi Mali nayo izasura Kenya i Nairobi.

Abakinnyi babanjemo ku mpande zombi ni aba bakurikira:

RWANDA: Mvuyekure Emery, Omborenga Fitina, Rwatubyaye Abdul, Nirisarike Salomon, Imanishimwe Emmanuel, Muhire Kevin, Mukunzi Yannick, Niyonzima Haruna, Byiringiro League, Tuyisenge Jacques na Bizimana Djihad

KENYA: Otiengo Ian Aubrey, Okumu Joseph Stanley, Asike Eugene Ambuchi, Macheso Daniel Sakari, Otiengo Eric Ouma, Odada Richard, Ochieng Lawrence Juma, Muguna Keneth Mugambi, Omondi Eric Johana, Ogada Michael Olunga, Choka Masudi Juma

                                             Abakinnyi 11 ba Kenya babanjemo.

        Byiringiro Lague ntago yahiriwe n’umukino kuko yawuvunikiyemo.
         Jacques Tuyisenge ahanganye na ba Myugariro ba Kenya

Related Articles

Leave a Reply

Your email address will not be published.

Back to top button