Amakuru

Amatora y’inzego z’ibanze azaba mu kwezi gutaha

Komisiyo y’igihugu y’amatora (NEC) yamaze gushyira ahagaragara ingengabihe izakurikizwa haba amatora y’inzego z’ibanze yari ateganyijwe kuba mu kwezi kwa kabiri uyu mwaka bitewe n’icyorezo cya covid-19, aya matora akaba azatorerwamo abazayobora kuva ku rwego rw’umudugudu kugera ku karere.

Aya matora azaba hubahirijwe ingamba zisanzweho zo kwirinda ikwirakwira rya Covid-19, muri iyo ngengabihe NEC yatangaje ko guhera tariki 11 Ukwakira kugera kuri 20 aribwo abifuza gutanga kandidature bazazitanga nyuma abazaba bemerewe kwiyamamaza bakazatangazwa tariki 26 Ukwakira.

Hagati ya tariki 3 na 12 Ugushyingo, nibwo aba bakandida baziyamamaza hifashishijwe ikoranabuhanga, maze amatora nyir’izina kuri iyi myanya abe kuwa 26 Ugushyingo 2021 mu gihe aya Biro z’inama njyanama z’Uturere na ya Komite Nyobozi z’Uturere azaba kuwa 19 Ugushyingo 2021.

Andi matora ateganyijwe harimo aya Komite Nyobozi y’Umudugudu azaba kuwa 23 Ukwakira, aya Biro y’Inama Njyanama y’Akagari azaba kuwa 30 Ukwakira, aya Biro y’Inama Njyanama y’Umurenge yo azaba ku itariki 6 Ukwakira 2021, ariko akabera rimwe n’amatora ya komite y’Inama z’igihugu ku Murenge.

Amatora y’abagize komite y’inama z’igihugu ku Karere yo azaba ku itariki 9 Ugushyingo.

Aya Komite Nyobozi y’Inama y’Igihugu y’Abagore n’iy’abantu bafite ubumuga ku Ntara n’Umujyi wa Kigali azaba kuwa 22 Ugushyingo naho ku munsi ukurikiyeho kuwa 23 Ugushyingo habe Amatora ya Komite Nyobozi z’Inama z’Igihugu ku rwego rw’Igihugu.

Ibyavuye mu matora yo ku rwego rw’Akarere, Intara n’Igihugu bizatangazwa bitarenze kuwa 26 Ugushyingo, bikurikirwe na raporo rusange y’amatora izatangazwa mbere y’uko umwaka wa 2021 urangira naho bitarenze kuwa 31 Mutarama 2022 iyi Komisiyo izaba yatanze urutonde rw’abatowe mu nzego zose n’ibibaranga.

Manda y’abazaba batowe bose izatangira muri Gashyantare 2022, aho izamara imyaka itanu nta gihindutse.

Aya matora yose azatwara miliyari 3 z’amafaranga y’u Rwanda nkuko biherutse gutangazwa na NEC.

Related Articles

Leave a Reply

Your email address will not be published.

Back to top button