AMATEKA

Amateka y’urutare rwa Kamageri

Mu rugendo rw’isaha imwe n’iminota 45 uvuye muri gare ya Nyabugogo mu mujyi wa Kigali werekeza mu majyepfo y’u Rwanda wagiye wubahiriza amategeko y’umuhanda uba ugeze mu karere ka Ruhango kamwe mu turere umunani tugize Intara y’amajyepfo y’u Rwanda, muri icyo gihe uba urenze umujyi wa Ruhango nibwo ubona urutare rwa Kamegeri.

Urutare mu bisanzwe ni ibuye rinini akenshi rijya rikurwamo amabuye yo kubakisha ibintu byinshi bitandukanye, Urutare rwa Kamegeri narwo nta tandukaniro n’ibindi bitare kuko ni ikibuye kinini  aricyo cyitwa urutare mu bisanzwe.

Uru rutare rufite amateka yihariye bituma rumenyekana mu mateka y’u Rwanda rwa kera ndetse kuri ubu hanubatswe inzu wakwita ndangamurage igaragaza amateka ya Kamegeri bituma haba hamwe mu hantu nyaburanga hakwiye gusurwa kugirango amateka yaho amenyekane.

Kuri ubu ku rutare rwa Kamegeri hubatswe inzu ndagamurage isobanura amateka.

Amateka ya Kamegeri n’ibyamubayeho byatumye uru rutare rumwitirirwa, Kamegeri uyu yari umutware ku ngoma y’umwami Mibambwe II Sekarongoro II Gisanura, ahagana mu mwaka w’1672. Kamegeri yitiriwe uru rutare, nyuma y’uko barumutwikiyeho, ibyo bikaba byarabayeho ku itegeko ry’umwami Mibambwe II Sekarongoro II Gisanura, ibi akaba yarabyifuje nyuma y’aho Kamegeri yari yabwiye umwami ko abazajya bagira nabi bazajya barujugunywaho rumaze gucanirwa.

Uyu mwami Mibambwe II Sekarongoro II Gisanura, yari azwiho ubwitonzi, kugira ubuntu, guha amata abakene begereye ibwami no kwanga akarengane. Ibyo byatumye bamuhimba igisingizo bamwita “Rugabishabirenge” kuko yatangaga atitangiye itama. Yari azwiho kandi kuba umucamanza utabera kandi wangaga ko hatangwa ibihano bidakwiye umuntu.

Urukuta rwerekana amateka yo ku rutare rwa Kamegeri.

Umunsi umwe, Mibambwe II Sekarongoro II Gisanura, yabajije abatware be igihano gisumba ibindi bumva umuntu mubi cyane mu gihugu yajya ahabwa , buri wese muri abo batware agenda avuga icye. Umwami yumvise hari abatware bifuriza rubanda ibihano birimo ubugome, maze asanze bikabije buri wese amuhanisha icyo yagiye avuga.

Umutware witwaga Kamegeri, we yari yavuze ko igihano cyiza ari ugusambura inzu ziri hafi aho, bagacaniriza urutare iyo sakamburiro kugeza aho urutare rutukura, noneho umuntu w’umugome bakarumushyiraho agashirira. Umwami nyuma yo gutekereza kuri icyo gihano, yasanze nta muntu mubi (w’umugome) kurusha Kamegeri. Nuko aca iteka ko uwo Kamegeri bamuhanisha icyo gihano kibi yahimbiye abandi, noneho baramuboha bamujugunya ari muzima ku rutare bacaniriye rwatukuye nk’uko yabyifurizaga abandi.

Burya koko ngo umwami ntiyica, hica abamuhuza na rubanda kandi nabo ari rubanda ! Mu buzima busanzwe, hari ubwo abantu usanga bifuriza abandi ibibi nk’uko Kamegeri yabikoze, ibyo bikaba byabatera kugambanira abandi, kubateranya ku bayobozi cyangwa abandi babakuriye, bakifuza ko ikibi cyaba ku bandi. Ibi ariko abateye batyo bakwiye kubyitondera, bakamenya ko hari ubwo ikibi wifuriza abandi nawe gishobora kukugeraho.

Related Articles

Leave a Reply

Your email address will not be published.

Back to top button