POLITIKI

Abadepite babiri batavuga rumwe na leta ya Uganda bafunzwe

Abadepite babiri bo mu ishyaka ritavuga rumwe n’ubutegetsi National Unity Platform (NUP) barezwe ubwicanyi bwakorewe mu karere ka Masaka, ni nyuma yuko bafashwe bagafungwa.

Kuwa mbere, depite Allan Ssewanyana na Muhammad Ssegirinya bahamagajwe n’ubugenzacyaha ngo babazwe, bahita baregwa  kugira uruhare mu bwicanyi bwabereye mu gace ka  Masaka barafungwa.

Kuwa kabiri nyuma ya saa sita nibwo bagejejwe mu rukiko rw’i Masaka.

Muri ako karere, mu byumweru bishize abantu bagera kuri 26 bishwe hakoreshejwe ibikoresho gakondo nk’imipanga, abarenga 10 muri bo bari abarengeje imyaka 50.
Ku wa mbere, umuvugizi wa polisi yari yabwiye abanyamakuru ko abanyapolitiki babiri aribo bacuze umugambi w’ubu bwicanyi mu nama zakorewe hafi y’i Kampala.
Hari abandi bantu 12 bo muri ako gace bafunzwe bashinjwa ubu bwicanyi.

Ubwicanyi bwabereye i Masaka bwahitanye abantu bagera kuri 26.

Hon. Mathias Mpuuga, ukuriye abatavugarumwe n’ubutegetsi mu nteko ishingamategeko akaba n’umukuru wungirije wa NUP, yabwiye BBC dukesha iyi nkuru ko ibiregwa bagenzi be ari ibihimbano bya leta bigamije kwangisha ishyaka ryabo rubanda.

Mu kwezi gushize, Perezida Yoweri Museveni avuga kuri ubu bwicanyi, yavuze ko “nta uzica Abanya-Uganda ngo abikire cyangwa aneshe leta mu gisirikare cyangwa politike”.

Ni inshuro ya gatatu mu myaka ya vuba habaye ubwicanyi nk’ubu muri Masaka.

Mu 2016 na 2018, habaye ubwicanyi nk’ubu bwibasira abaturage, hari abantu bafashwe barafungwa ariko nta rubanza na rumwe rwarangijwe.

Related Articles

Leave a Reply

Your email address will not be published.

Back to top button