AmakuruIMYIDAGADURO

Umunyamuziki REMA yasesekaye I Kigali

Umuhanzi ukomoka mu gihugu cya Nigeria Divine Ikubora uzwi nka Rema ufite imyaka 21 y’amavuko, yaraye ageze  mu Rwanda, aho biteganyijwe ko azaririmba mu gitaramo kizasoza umukino wa Basketball w’abakinnyi b’intoranywa muri Shampiyona yo mu Rwanda.

Uyu muhanzi yageze ku kibuga cy’indege Mpuzamahanga cya Kigali i Kanombe mu ijoro ry’uyu wa Gatatu tariki 17 Ugushyingo 2021 ahagana saa tatu z’ijoro.

Uyu muhanzi azahurira ku rubyiniro n’abahanzi Mike Kayihura, Confy, Kivumbi King mu gitaramo kizabera muri Kigali Arena ku wa 20 Ugushyingo 2021.

Kwinjira muri iki gitaramo ni 5,000 Frw mu myanya isanzwe, 10,000 Frw muri VIP na 20,000 Frw muri VVIP.

Mu mashusho yasohoye, Rema yateguje abafana be n’abakunzi b’umuziki igitaramo cyiza. Ni ku nshuro ya mbere, uyu muhanzi agiye gukorera igitaramo mu Rwanda.

Rema ni umunyamuziki akaba n’umuraperi. Yamenyekanye cyane binyuze mu ndirimbo ‘Iron Man’ Barack Obama wabaye Perezida wa Leta Zunze Ubumwe za Amerika yashyize ku rutonde rw’izo yakunze mu mwaka wa 2019.

Ubu, ni umwe mu bahanzi babarizwa muri Jonzing World, ishami ry’inzu ifasha abahanzi mu bya muzika yitwa Mavin Records iri mu zikomeye muri Nigeria.

Rema yavukiye mu Mujyi wa Benin. Mu 2018 yasubiyemo indirimbo ‘Gucci Gang’ y’umuraperi D’Prince bimuhesha amahirwe yo gufahwa n’uyu muraperi yinjira muri Label ya ‘Jonzing World’.

Mu 2019 yasohoye Extended Play (EP) yaciye agahigo ko kuyobora indirimbo zumviswe cyane ku rubuga rwa Apple muri Nigeria. Icyo gihe, kandi Label ye yahise imufasha gukora amashusho y’indirimbo ‘Dumebi’ yitiriye iyi EP ye.

Uyu muhanzi yegukanye ibihembo birimo ‘Next Rated’, umuhanzi mushya mwiza w’umwaka mu bihabwa abahanzi b’Abanyafurika bizwi nka ‘Sound City MVP Awards”.

Rema yahataniye na none ibihembo bya BET Awards mu cyiciro kizwi nka ‘Viewers Choice’ kimwe n’abahanzi barimo Burna Boy na Wizkid babashije guhanga muri 2020 bakomoka muri Nigeria.

Uyu muhanzi azwi mu ndirimbo ‘Soundgasm’, ‘Spiderman’, ‘American Love’, ‘Ginger Me’, ‘Peace of mind’ n’izindi.

Related Articles

Leave a Reply

Your email address will not be published.

Back to top button